Endi ilm-fan ortidan ham milliarder bo‘lish mumkin

2025-yilda xalqaro fan olimpiadalarida g‘olib bo‘lgan o‘zbekistonlik o‘quvchilar va ularning ustozlariga jami 13 mlrd so‘m pul mukofoti topshirildi. Bu ko‘rsatkich eng nufuzli xalqaro fan olimpiadalari tarixida rekord natija bo‘ldi.

Joriy yilda o‘zbekistonlik o‘quvchilar dunyoning turli davlatlarida o‘tkazilgan eng nufuzli 5 ta xalqaro fan olimpiadasida jami 13 ta medalni (2 ta oltin, 7 ta kumush va 4 ta bronza) qo‘lga kiritdi.

Xususan:

• Birlashgan Arab Amirliklarida 96 davlat ishtirokida o‘tkazilgan Xalqaro kimyo olimpiadasida — 2 ta oltin, 2 ta kumush;

• Avstraliyada 105 davlat qatnashgan Xalqaro matematika olimpiadasida — 4 ta kumush, 1 ta bronza;

• Boliviyada 90 dan ortiq davlat ishtirokidagi Xalqaro informatika olimpiadasida — 1 ta kumush, 1 ta bronza;

• Parij shahrida 96 davlat qatnashgan Xalqaro fizika olimpiadasida — 2 ta bronza medal qo‘lga kiritildi.

Shuningdek, 2025-yilda o‘quvchilar 29 ta xalqaro fan olimpiadasida ishtirok etib, jami 210 ta medalni (40 ta oltin, 78 ta kumush, 92 ta bronza) qo‘lga kiritdi.

Taqqoslash uchun: 2019-yilda — 30 ta, 2020-yilda — 25 ta, 2021-yilda — 45 ta, 2022-yilda — 41 ta, 2023-yilda — 96 ta, 2024-yilda esa 128 ta medal qo‘lga kiritilgan.

O‘zbekistonlik o‘quvchilar Toshkent shahrida o‘tkazilgan Al-Xorazmiy nomidagi Xalqaro matematika va informatika olimpiadasida 50 ta (7 ta oltin, 13 ta kumush, 30 ta bronza), Abu Rayhon Beruniy nomidagi Xalqaro kimyo olimpiadasida esa 19 ta medal (6 ta oltin, 8 ta kumush, 5 ta bronza) bilan yakka peshqadam bo‘ldi.

E’tiborli jihati shundaki, joriy yilda ilk bor nufuzli xalqaro fan olimpiadasida oltin medal sohibiga 1 mlrd so‘mdan ortiq pul mukofoti berilmoqda. Masalan, Daler Rahimov va Mirjahon Muhammadovga 1 mlrd 40 mln so‘mdan, ularni tayyorlagan ustoz Mohira Boltayevaga esa 591 mln so‘m mukofot puli berildi.

Ma’lumot uchun, nufuzli 5 ta xalqaro fan olimpiadasida (IMO, IChO, IBO, IPhO, IOI) sovrindor bo‘lgan o‘quvchilarga quyidagi miqdorda pul mukofoti belgilanadi:

• Oltin medal uchun — 1 mlrd 30 mln so‘m;

• Kumush medal uchun — 618 mln so‘m;

• Bronza medal uchun — 412 mln so‘m.

Ularning ustozlariga esa:

• Oltin medal uchun — 185 mln 400 ming so‘m;

• Kumush medal uchun — 103 mln so‘m;

• Bronza medal uchun — 61 mln 800 ming so‘m.

Joriy yilda g‘oliblarga ajratilgan mukofot puli 13 mlrd so‘mni tashkil etdi. Taqqoslash uchun, o‘tgan yili bu ko‘rsatkich 3,5 mlrd so‘mni tashkil etgan.