5 ming nafardan ortiq o‘qituvchi attestatsiyasiz toifa oldi

Ma’lumki, Vazirlar Mahkamasining 2021-yil 17-sentabrdagi 572-sonli qarori bilan tasdiqlangan “Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida”gi Nizomga muvofiq, belgilangan talablarga javob beradigan pedagog kadrlarga malaka toifalari sinov jarayonlari o‘tkazilmasdan, to‘g‘ridan-to‘g‘ri berilishi qayd etilgan.

Maktabgacha va maktab ta’limi vazirligining xabar berishicha, 2026-yilning 1-yanvaridan 1-iyuniga qadar pedagog xodimlarning murojaatlari asosida jami 5 163 nafar, xususan:

• 1 933 nafar pedagogga — oliy malaka toifasi;

• 2 014 nafar pedagogga — birinchi malaka toifasi;

• 1 216 nafar pedagogga — ikkinchi malaka toifasi berildi.

Ayni vaqtda mazkur malaka toifalari tasdiqlanib, pedagoglarning shaxsiy kabinetlariga sertifikatlar yuborilgan.

Ma’lumot uchun: Amaldagi tartibga ko‘ra, quyidagi pedagog kadrlarga malaka toifasi attestatsiyadan o‘tkazilmasdan beriladi:

Maktabgacha va maktab ta’limi vazirligi tomonidan ro‘yxati tasdiqlanadigan sport musobaqalarining:

• xalqaro hamda respublika bosqichida 3-o‘rinni egallagan tarbiyalanuvchisini tayyorlagan maktabgacha ta’lim tashkilotlarining jismoniy tarbiya yo‘riqchilariga — ikkinchi malaka toifasi (katta o‘qituvchi lavozimi);

• xalqaro hamda respublika bosqichida 2-o‘rinni egallagan tarbiyalanuvchisini tayyorlagan maktabgacha ta’lim tashkilotlarining jismoniy tarbiya yo‘riqchilariga — birinchi malaka toifasi (yetakchi o‘qituvchi lavozimi);

• xalqaro hamda respublika bosqichida 1-o‘rinni egallagan tarbiyalanuvchisini tayyorlagan maktabgacha ta’lim tashkilotlarining jismoniy tarbiya yo‘riqchilariga — oliy malaka toifasi (bosh o‘qituvchi lavozimi);

belgilangan tartibda tasdiqlanadigan xalqaro va respublika miqyosidagi sport hamda ommaviy jismoniy tarbiya tadbirlarining respublika, hududiy va jismoniy tarbiya-sport tashkilotlari kalendar-rejalariga kiritiladigan, shuningdek, O‘zbekiston Respublikasi hududida o‘tkaziladigan xalqaro va respublika miqyosidagi rasmiy sport yoki ommaviy jismoniy tarbiya tadbirlari ro‘yxatiga kiritilgan sport musobaqalarining:

• xalqaro hamda respublika bosqichida 3-o‘rinni egallagan o‘quvchisini tayyorlagan ta’lim tashkilotlari jismoniy tarbiya fani o‘qituvchilariga — ikkinchi malaka toifasi (katta o‘qituvchi lavozimi);

• xalqaro hamda respublika bosqichida 2-o‘rinni egallagan o‘quvchisini tayyorlagan ta’lim tashkilotlari jismoniy tarbiya fani o‘qituvchilariga — birinchi malaka toifasi (yetakchi o‘qituvchi lavozimi);

• xalqaro hamda respublika bosqichida 1-o‘rinni egallagan o‘quvchisini tayyorlagan ta’lim tashkilotlari jismoniy tarbiya fani o‘qituvchilariga — oliy malaka toifasi (bosh o‘qituvchi lavozimi);

jismoniy tarbiya fani olimpiadasining, shuningdek, “Besh tashabbus olimpiadasi”, olimpiya, noolimpiya va milliy sport turlari bo‘yicha uch bosqichli umumrespublika sport musobaqalarining:

• respublika (final) bosqichida 3-o‘rinni egallagan o‘quvchisini tayyorlagan ta’lim tashkilotlarining jismoniy tarbiya fani o‘qituvchilariga — ikkinchi malaka toifasi (katta o‘qituvchi lavozimi);

• respublika (final) bosqichida 2-o‘rinni egallagan o‘quvchisini tayyorlagan ta’lim tashkilotlarining jismoniy tarbiya fani o‘qituvchilariga — birinchi malaka toifasi (yetakchi o‘qituvchi lavozimi);

• respublika (final) bosqichida 1-o‘rinni egallagan o‘quvchisini tayyorlagan ta’lim tashkilotlarining jismoniy tarbiya fani o‘qituvchilariga — oliy malaka toifasi (bosh o‘qituvchi lavozimi);

• xalqaro matematika (IMO), fizika (IPhO), kimyo (IChO), biologiya (IBO) informatika (IOI) olimpiadalarida oltin, kumush yoki bronza medalni (birinchi, ikkinchi va uchinchi o‘rinni) qo‘lga kiritgan sovrindor o‘quvchini tayyorlagan ta’lim tashkilotlarining pedagog kadrlariga — oliy malaka toifasi (bosh o‘qituvchi lavozimi).

Quyidagi pedagog kadrlarining malaka toifasi (lavozimi) bir pog‘onaga oshiriladi

• O‘zbekiston Respublikasining davlat mukofotlari bilan taqdirlangan pedagog kadrlar;

• “Ustoz” milliy mukofoti g‘oliblari;

• Worldskills musobaqalari sovrindorlarini tayyorlagan ta’lim tashkilotlarining pedagog kadrlari;

• respublika miqyosidagi fan olimpiadalari va ko‘rik-tanlovlarda g‘oliblikni qo‘lga kiritgan o‘quvchilarni tayyorlagan pedagog kadrlar;

• Yilning eng yaxshi tarbiyachisi” kasbiy ko‘rik-tanlovining respublika bosqichi g‘oliblari.