Endilikda attestatsiyadan o‘tmasdan turib, ikkinchi va birinchi malaka toifasini olishi mumkin bo‘ladi

Vazirlar Mahkamasining 2021-yil 17-sentyabrdagi 572-son qarori bilan tasdiqlangan ‘‘Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida’’gi nizomning 10-bandiga muhim o‘zgartirishlar kiritildi.

Vazirlar Mahkamasining 2026-yil 29-iyuldagi 411-son qarori bilan kiritilgan o‘zgartirishlarga ko‘ra, endilikda pedagoglarning oliy ma’lumot darajasi va o‘qishdagi natijalariga qarab ularga malaka toifalari beriladi.

Bunda 2026-yildan boshlab bakalavriatni imtiyozli diplom bilan tamomlagan hamda ilk bor ta’lim tashkilotiga ishga kirayotgan bitiruvchilarga avtomatik ravishda ikkinchi malaka toifasi (katta o‘qituvchi lavozimi) beriladi.

Shuningdek, magistr darajasiga ega mutaxassislar, oliy ma’lumot bo‘yicha akademik darajalar joriy etilgunga qadar olingan oliy ma’lumotli pedagoglar ikkinchi malaka toifasi (katta o‘qituvchi lavozimi) bilan faoliyat yuritishi mumkin.

Joriy yildan boshlab esa magistraturani tamomlab, barcha fanlardan hamda attestatsiyadan “5” (a’lo), ya’ni 90–100 ball natija ko‘rsatgan va ilk bor ta’lim tashkilotiga ishga kirayotgan bitiruvchilarga esa birinchi malaka toifasi (yetakchi o‘qituvchi lavozimi) beriladi.

Eslatib o‘tamiz, ushbu tashabbus O‘zbekiston Respublikasi Prezidenti Shavkat Mirziyoyevning 2025-yil 15-sentyabrda bir guruh o‘qituvchi va murabbiylar bilan bo‘lib o‘tgan uchrashuvi chog‘ida ilgari surilgandi.