Endi malaka toifasiga ega bo‘lgan o‘qituvchilarga ustama uchun ball qo‘shib beriladi

Endilikda pedagog xodimlarga malaka toifasi darajasiga qarab, direktor jamg‘armasi hisobidan tayinlanadigan ustama uchun 5 balldan 20 ballgacha qo‘shib beriladi.

Vazirlar Mahkamasining 2025-yil 21-oktabrdagi 662-sonli qarori bilan “Umumiy o‘rta ta’lim muassasalarining o‘rnak ko‘rsatgan xodimlarini rag‘batlantirishning direktor jamg‘armasini tashkil etish va uning mablag‘laridan foydalanish tartibi to‘g‘risida”gi nizomga qo‘shimcha va o‘zgartirishlar kiritildi.

Qaror bilan o‘qituvchilar faoliyatini baholash mezonlaridagi 9-ko‘rsatgich, ya’ni, o‘qituvchining pedagoglik faoliyatini baholash mezoni chiqarib tashlanib, uning o‘rniga malaka toifasiga qarab, o‘qituvchilarga ball qo‘shib beriladigan bo‘ldi.

Bunda o‘qituvchilarga amaldagi malaka toifasiga qarab quyidagicha ball beriladi:

• Mutaxassis lavozimida bo‘lsa – 0 ball;

• Ikkinchi malaka toifasiga ega bo‘lsa — 5 ball;

• Birinchi malaka toifasiga ega bo‘lsa — 10 ball;

• Oliy malaka toifasiga ega bo‘lsa — 20 ball beriladi.

Eslatib o‘tamiz, avvalgi tartibda malaka toifasi ko‘rsatgichlari o‘rniga o‘qituvchining pedagogik faoliyatiga o‘quvchilar (o‘qituvchi dars beradigan sinflardagi o‘quvchilarning kamida 60 foizi o‘rtasida) va baholashda qatnashgan Kuzatuv kengashi a’zolari o‘rtasida o‘tkaziladigan so‘rovnoma natijalari (ijobiy fikrlari) hisobga olinib, buning uchun pedagoglarga 5 ball berilardi.