Bolalar bog‘chasida go‘sht “urib qolinishi” ortidan mudira ishdan olindi

12:40 / 15.07.2024 1.66k

Buxorodagi bog‘chada 150 bola ovqatiga 300 gramm go‘sht solingani aniqlandi.

Buxoro viloyatining Peshku tumanidagi bog‘chada bolalar haqiga xiyonat qilinayotgani haqidagi videolavha tarqaldi. Shundan so‘ng, viloyat maktabgacha ta’lim boshqarmasi holat yuzasidan ma’lumot berdi.

Ma’lum qilinishicha, 10-iyul kuni Peshku tuman hokimi Vahobjon Qahhorov rahbarligida ishchi guruhi tuzilib, tumandagi ijtimoiy obyektlar qatorida 14-MTT faoliyati ham o‘rganilgan.

O‘rganish jarayonida muassasa oshxonasida tarbiyalanuvchilar uchun tayyorlanayotgan birinchi ovqatga 5,850 gramm, ikkinchi ovqatga esa 300 gramm go‘sht solingani aniqlangan.

Ushbu bog‘chada 158 nafar bola ro‘yxatga olingan bo‘lib, tekshiruv o‘tkazilgan kuni 150 nafar bolaga ovqat tayyorlanayotgan bo‘lgan.

Ayni paytda MTT mudirasi bilan tuzilgan mehnat shartnomasi bekor qilingan.

Hozirda holat yuzasidan tegishli tashkilotlar tomonidan surishtiruv ishlari olib borilmoqda.