Maktabda qimor o‘yini tashkil qilgan direktor ishdan olindi

Joriy yilning 17-dekabr kuni Namangan viloyati Chortoq tumani 8-umumiy o‘rta ta’lim maktabi direktori mazkur ta’lim muassasasida qimor o‘yini tashkil qilgani aniqlandi. Bu haqda Namangan viloyati Maktabgacha va maktab ta’limi boshqarmasi Axborot xizmati xabar berdi.

Xabarda keltirilishicha, holat Chortoq tumani IIB xodimlari tomonidan o‘tkazilgan reyd tadbiri davomida aniqlangan.

Ta’lim muassasasi maxsus reyd tadbiri davomida borib o‘rganilganda 8-umumiy o‘rta ta’lim maktabi direktori o‘z xizmat xonasida qimor o‘yini tashkil etib, sheriklari bilan o‘ynayotgan bo‘lgan.

“Hozirda holat yuzasidan tuman IIB tomonidan tergovga qadar surishtiruv ishlari olib borilmoqda. Tashkilotda o‘rnatilgan ichki mehnat tartib qoidalarini qo‘pol ravishda buzganligi uchun maktab direktori bilan tuzilgan mehnat shartnomasi ish beruvchi tashabbusiga ko‘ra bir tomonlama bekor qilingan”, deyiladi Axborot xizmati xabarida.