Maktabdagi kassir vazifasini o‘qituvchi yoki “zavuch”ga biriktirish mumkinmi?

Savol

Maktablarda xo‘jalik ishlari bo‘yicha direktor o‘rinbosarlilariga g‘aznachi shtatini biriktirib shuni hisobidan ish haqlariga qo‘shimcha ish xaqi berilishi kerakligini bilardim, lekin ba’zi maktab direktorlari o‘ziga tegishli odamlariga biriktirib qo‘ygan.

Masalan, ba’zilari maktab o‘qituvchisi, ba’zilari o‘zining o‘quv ishlari bo‘yicha o‘rinbosarlarini qo‘ygan. Shu qanchalik to‘g‘ri? Iltimos shu savolga qonun doirasida javob bering.

Javob

O‘zbekiston Respublikasi Prezidentining 2007-yil 29-martdagi PQ-609-sonli qarori bilan umumta’lim maktablarining namunaviy shtatlarini tartibga solish chora-tadbirlari belgilangan.

Mazkur qarorning 4-bandida oylik maoshi va unga teng to‘lovlarni to‘lash uchun naqd pul beruvchi moddiy-mas’ul shaxs (kassir)ning vazifasi umumta’lim maktablarining ma’muriy-xo‘jalik bo‘yicha direktor o‘rinbosari yoki xo‘jalik mudiri zimmasiga ularning lavozimi uchun belgilangan okladiga ular tomonidan ushbu funksiya amalda bajarilganda mehnatga haq to‘lashning eng kam miqdorining 35,2 foizi miqdorida qo‘shimcha oylik maoshi belgilash bilan yuklanishi nazarda tutilgan.

Shundan kelib chiqib, g‘aznachi (kassir) vazifasini maktab o‘qituvchisi yoki o‘quv ishlari bo‘yicha direktor o‘rinbosariga shunchaki direktorning xohishiga ko‘ra biriktirish qonunchilikka zid. Mazkur vazifa aynan ma’muriy-xo‘jalik bo‘yicha direktor o‘rinbosari yoki xo‘jalik mudiri zimmasiga yuklatilishi va qo‘shimcha haq ham ushbu vazifa amalda bajarilganda to‘lanishi belgilangan.

Demak, agar maktabda ushbu lavozim mavjud bo‘lsa, g‘aznachi (kassir) vazifasini unga tegishli bo‘lmagan boshqa xodimga biriktirib, shu asosda qo‘shimcha haq to‘lash prezidentning PQ-609-son qarorida belgilangan zid hisoblanadi.