Vazirlar Mahkamasining 2023-yil 25-dekabrdagi 681-son qarori



[OKOZ:

1.13.00.00.00 Ta’lim. Fan. Madaniyat / 13.01.00.00 Ta’lim / 13.01.01.00 Umumiy qoidalar]

[TSZ:

1.Ijtimoiy-madaniy masalalar / Ta’lim]

O‘zbekiston Respublikasi Vazirlar Mahkamasining

qarori

Davlat umumiy o‘rta ta’lim muassasalari direktori lavozimiga nomzodlarni menejerlik o‘quv kurslarida o‘qitish va ularga menejerlik sertifikatini berish tartibi to‘g‘risidagi nizomni tasdiqlash haqida

O‘zbekiston Respublikasi Prezidentining “2022 — 2026-yillarda maktab ta’limini rivojlantirish bo‘yicha milliy dasturni tasdiqlash to‘g‘risida” 2022-yil 11-maydagi PF-134-son, “Maktabgacha va maktab ta’limi vazirligi hamda uning tizimidagi tashkilotlar faoliyatini samarali tashkil etish chora-tadbirlari to‘g‘risida” 2023-yil 26-maydagi PF-79-son farmonlari ijrosini ta’minlash maqsadida Vazirlar Mahkamasi qaror qiladi:

1. 2024-yil 1-yanvardan boshlab A. Avloniy nomidagi pedagoglarni kasbiy rivojlantirish va yangi metodikalarga o‘rgatish milliy-tadqiqot institutida O‘zbekiston Respublikasi Maktabgacha va maktab ta’limi vazirligi tizimidagi umumiy o‘rta ta’lim muassasasi (keyingi o‘rinlarda — maktab) direktori lavozimiga nomzodlarni menejerlik o‘quv kurslarida o‘qitish hamda maxsus portal orqali ularga menejerlik sertifikatini elektron shaklda berish tizimi joriy qilinsin.

2. Belgilansinki:

a) Qoraqalpog‘iston Respublikasi Maktabgacha va maktab ta’limi vazirligi, viloyatlar hamda Toshkent shahar maktabgacha va maktab ta’limi boshqarmalari tomonidan menejerlik sertifikatiga ega bo‘lgan nomzodlar orasidan maktab direktori lavozimiga nomzodlar zaxirasi shakllantiriladi.

Bunda maktab direktori vakant lavozimlariga nomzodlar faqat sertifikati mavjud bo‘lgan va ushbu bandning “a” kichik bandi birinchi xatboshisida ko‘rsatilgan nomzodlar zaxirasiga kiritilgan kadrlar orasidan tanlab olinadi;

b) 2024-yil 1-sentabrdan boshlab menejerlik sertifikatiga ega bo‘lgan quyidagi rahbar xodimlarga ushbu sertifikatning amal qilish muddati davomida lavozim maoshiga har oylik qo‘shimcha ustamalar to‘lanadi:

maktab direktorlariga — 50 foiz;

maktab direktori o‘rinbosarlariga — 30 foiz.

3. Davlat umumiy o‘rta ta’lim muassasalari direktori lavozimiga nomzodlarni menejerlik o‘quv kurslarida o‘qitish va ularga menejerlik sertifikatini berish tartibi to‘g‘risidagi nizom ilovaga muvofiq tasdiqlansin.

4. Belgilansinki, ushbu qarorning ijrosi uchun talab etiladigan mablag‘lar 2024-yilda Maktabgacha va maktab ta’limi vazirligiga ajratilgan mablag‘lar doirasida moliyalashtiriladi, 2025-yildan boshlab esa Davlat budjeti parametrlarida nazarda tutiladi.

5. Mazkur qarorning bajarilishini nazorat qilish O‘zbekiston Respublikasi maktabgacha va maktab ta’limi vaziri X.U. Umarova zimmasiga yuklansin.

O‘zbekiston Respublikasining Bosh vaziri A. ARIPOV

Toshkent sh.,

2023-yil 25-dekabr,

681-son

Vazirlar Mahkamasining 2023-yil 25-dekabrdagi 681-son qaroriga

ILOVA

Davlat umumiy o‘rta ta’lim muassasalari direktori lavozimiga nomzodlarni menejerlik o‘quv kurslarida o‘qitish va ularga menejerlik sertifikatini berish tartibi to‘g‘risida

NIZOM

1-bob. Umumiy qoidalar

1. Mazkur Nizom O‘zbekiston Respublikasi Maktabgacha va maktab ta’limi vazirligi tizimidagi umumiy o‘rta ta’lim muassasalari (keyingi o‘rinlarda — maktab) direktori lavozimiga nomzodlarni (keyingi o‘rinlarda — nomzodlar) menejerlik o‘quv kurslarida o‘qitish va ularga menejerlik sertifikatini berish tartibini belgilaydi.

2. Ushbu Nizom asosida menejerlik sertifikatiga ega bo‘lgan nomzodlarga maktab direktori lavozimi uchun tanlovda ishtirok etish huquqi beriladi.

Maktablarda faoliyat yuritayotgan direktorlar (keyingi o‘rinlarda — direktorlar) har 5 yilda bir marotaba ushbu Nizom talablariga muvofiq menejerlik sertifikatini olishi talab etiladi.

Bunda menejerlik sertifikatiga ega bo‘lgan direktorlar olgan yildan boshlab uch yil davomida malaka oshirish kurslaridan ozod etiladi.

3. Nomzodlarning boshqaruv sohasiga oid bilim va ko‘nikmalarini baholash hamda baholash natijasi bo‘yicha davlat namunasidagi menejerlik sertifikati elektron raqamli imzo bilan tasdiqlangan va QR-kod qo‘yilgan holda elektron shaklda beriladi.

4. Mazkur Nizom talablari quyidagi davlat umumiy o‘rta ta’lim muassasalari direktori lavozimlariga nisbatan tatbiq etilmaydi:

Prezident, ijod va ixtisoslashtirilgan maktablar;

jismoniy, aqliy, sensor yoki ruhiy nuqsonlari bo‘lgan bolalar uchun ixtisoslashtirilgan ta’lim muassasalari;

sanatoriy turidagi ixtisoslashtirilgan davlat ta’lim muassasalari;

ixtisoslashtirilgan maktab-internatlar va ixtisoslashtirilgan maktablar;

alohida sharoitlarda ta’minlash, tarbiyalash va ta’lim berishga muhtoj bolalar uchun ixtisoslashtirilgan maktablar.

5. Ushbu Nizomda quyidagi asosiy tushunchalar qo‘llaniladi:

menejerlik o‘quv kursi (keyingi o‘rinlarda — o‘quv kursi) — nomzodlarni tayyorlash uchun tasdiqlangan o‘quv rejasi va dasturlari asosida ishlab chiqilgan mashg‘ulotlar tizimi;

menejerlik sertifikati (keyingi o‘rinlarda — sertifikat) — davlat maktabi direktori lavozimida ishlash huquqini beruvchi hujjat;

maxsus portal — O‘zbekiston Respublikasi Maktabgacha va maktab ta’limi vazirligining nomzodlarni ro‘yxatdan o‘tkazish, o‘quv kursi talablari va muddatlari haqida hamda o‘quv kursi bilan bog‘liq boshqa ma’lumotlar joylashtiriladigan elektron dasturiy tizimi;

o‘quv rejasi — o‘quv kursida o‘qitiladigan o‘quv modullari, ularga ajratilgan soatlar, o‘qitish muddatlari va shakllari belgilab berilgan hujjat;

o‘quv dasturi — har bir o‘quv mavzusining mazmuni, mashg‘ulot shakli, tinglovchilar tomonidan o‘zlashtirilishi lozim bo‘lgan bilim, ko‘nikma va malakalar hajmi belgilab berilgan hujjat;

yakuniy sinov — o‘quv kursi oxirida o‘tkaziladigan yakuniy nazorat, amaliy topshiriqlar ijrosini baholash jarayoni.

2-bob. O‘quv kurslarini tashkil etish

6. Uquv kurslari ushbu Nizomga 1-ilovadagi sxemaga muvofiq tashkil etiladi.

7. Uquv kurslari A. Avloniy nomidagi pedagoglarni kasbiy rivojlantirish va yangi metodikalarga o‘rgatish milliy-tadqiqot instituti (keyingi o‘rinlarda — Institut) tuzilmasidagi Xalq ta’limi xodimlarining bilim darajasi va kasbiy mahoratini baholash markazi (keyingi o‘rinlarda — Markaz) tomonidan tashkil etiladi.

8. O‘quv kurslari to‘g‘risidagi ma’lumotlar maxsus portalga joylashtiriladi.

9. Nomzodlar maxsus portal orqali elektron shaklda ro‘yxatdan o‘tadi hamda o‘quv kursida o‘qish uchun ariza topshiradi.

Bunda nomzodlar kamida bakalavr darajasiga hamda maktab direktorlari uchun belgilangan malaka talablariga muvofiq bo‘lishi lozim.

10. Ta’limda menejment mutaxassisligi bo‘yicha magistr darajasiga ega bo‘lgan nomzodlar o‘quv kursida o‘qimasdan sertifikat olish bo‘yicha test sinovlarida ishtirok etishlari mumkin.

Ta’limda menejment ixtisosligi bo‘yicha ilmiy darajaga ega bo‘lgan nomzodlar uchun sertifikat ularning arizasiga asosan to‘g‘ridan-to‘g‘ri beriladi.

11. Arizalar har oyning 5-sanasiga qadar (iyul-avgust oylari bundan mustasno) qabul qilinadi.

12. O‘quv kurslariga jalb etilgan nomzodlar ro‘yxati ularning arizalari asosida Institut tomonidan shakllantiriladi hamda tasdiqlanadi.

13. Nomzodlarni o‘quv kurslarida o‘qitish hamda baholash ular bilan Institut o‘rtasida tuzilgan shartnoma asosida amalga oshiriladi.

14. Uquv kurslari 20 — 30 nafar tinglovchilardan iborat akademik guruhlarda tashkil etiladi.

Tinglovchilar kontingenti yetarli bo‘lmagan taqdirda, shu jumladan, rus tilida dars olib boriladigan guruhlarda tinglovchilar soni, istisno tariqasida, kamida 15 nafar etib belgilanishi mumkin.

15. Direktorlarning o‘quv kurslarida ishtirok etishi bo‘yicha reja-taqsimoti har yili 1-dekabrga qadar Institut tomonidan shakllantiriladi hamda O‘zbekiston Respublikasi Maktabgacha va maktab ta’limi vazirligi tomonidan tasdiqlanadi.

16. O‘quv kurslarining o‘quv rejasi va dasturlari Institut tomonidan ishlab chiqiladi, Ixtisoslashtirilgan ta’lim muassasalari agentligi huzuridagi Pedagogik mahorat va xalqaro baholash ilmiy-amaliy markazi tomonidan ekspertizadan o‘tkaziladi hamda O‘zbekiston Respublikasi maktabgacha va maktab ta’limi vazirining buyrug‘i bilan tasdiqlanadi.

Bunda tinglovchilar o‘quv dasturlari asosida jamoada ishlash va ota-onalar bilan muloqot qilish, boshqaruv, moliyaviy hisob-kitoblarni amalga oshirish hamda axborot-kommunikatsiya texnologiyalari ko‘nikmalari bo‘yicha o‘qitiladi.

17. O‘quv kurslarining davomiyligi 144 soatni tashkil qilib, bir oy davomida o‘qitiladi. Kursdagi auditoriya mashg‘ulotlarining eng yuqori hajmi haftasiga 36 soat etib belgilanadi.

18. O‘quv mashg‘ulotlari nazariy, amaliy va maktab amaliyotidan iborat bo‘ladi. Nazariy va amaliy mashg‘ulotlar Institutda, maktab amaliyoti esa maktab hamda ta’lim boshqaruvini amalga oshiradigan tashkilotlarda o‘tkaziladi.

19. Nomzodlarning ixtiyoriy tanlovi asosida o‘quv kurslari ishlab chiqarishdan ajralgan yoki ajralmagan (masofaviy, onlayn) holda tashkil etilishi mumkin.

20. Nomzod quyidagi holatlarda o‘quv kursidan chetlashtiriladi:

o‘quv intizomini va ichki tartib-qoidalarni buzganligi uchun;

o‘quv kursidagi dars mashg‘ulotlarini uzrli (kasalligi, davlat yoki jamoat vazifalarini bajarganligi, yaqin qarindoshining vafoti) sabablarsiz 18 soat va undan ortiq qoldirgani uchun;

salomatligi tufayli (tibbiy komissiya ma’lumotnomasi asosida);

nomzodga nisbatan sud hukmi asosida;

vafot etganligi sababli.

21. O‘quv kurslarini muvaffaqiyatli tugatgan nomzodlar sertifikat berish bo‘yicha yakuniy sinovlarga qo‘yiladi.

3-bob. O‘quv kurslarini moliyalashtirish

22. O‘quv kurslarida bir nafar nomzod uchun o‘qitish xarajatlarining to‘lov miqdori Institutning asoslangan kalkulatsiyasiga muvofiq Maktabgacha va maktab ta’limi vazirligi hamda Iqtisodiyot va moliya vazirligi tomonidan har yili 1-dekabrga qadar tasdiqlanadi.

Bunda moliya yili davomida qonunchilik hujjatlariga muvofiq ish haqi miqdorlari va shartlari o‘zgargan hollarda bir nafar nomzod uchun to‘lov miqdori qayta ko‘rib chiqilishi mumkin.

23. Tasdiqlangan o‘qitish xarajatlari uchun to‘lov miqdori nomzodlardan undiriladi va ushbu mablag‘lar Institutning budjetdan tashqari jamg‘armasiga yo‘naltiriladi.

Ishdan ajralgan holda o‘quv kurslarda ishtirok etish uchun nomzodlarning o‘qishi davrida ularning ish haqi miqdorlari saqlab qolinmaydi va safar xarajatlari qoplab berilmaydi.

24. Reja-taqsimotga kiritilgan direktorlarni o‘qitish xarajatlari O‘zbekiston Respublikasi respublika budjetidan birinchi darajali budjet mablag‘larini taqsimlovchi sifatida Maktabgacha va maktab ta’limi vazirligiga ajratilgan budjet mablag‘lari hisobidan Institutning xarajatlar smetasida nazarda tutilgan holda amalga oshiriladi.

25. Direktorlarning o‘quv kursiga jalb etiladigan professor-o‘qituvchilarning sonini belgilashda, Institut va Pedagoglarni yangi metodikalarga o‘rgatish milliy markazlari uchun belgilangan bir nafar o‘qituvchi hisobiga to‘g‘ri keladigan tinglovchilar soni nisbatining cheklangan normativlari qo‘llaniladi.

26. Direktorlarning o‘qish davrida ularning asosiy ish joyi bo‘yicha lavozimi va amaldagi o‘rtacha ish haqi miqdorlari saqlab qolinadi.

27. Ishdan ajralgan holda o‘quv kurslarda ishtirok etish uchun yuborilgan direktorlar uchun qonunchilik hujjatlarida belgilangan tartibda xizmat safari bilan bog‘liq xarajatlar ularning asosiy ish joyidan qoplanadi.

28. Direktorlar birinchi marta menejerlik sertifikatini olgandan so‘ng, keyingi menejerlik o‘quv kurslarida o‘qish va menejerlik sertifikatini olishda nomzod sifatida ishtirok etadi.

Bunda 2024-yil 1-yanvarga qadar direktor lavozimida ishlab kelayotgan xodimlarni o‘qitish va sertifikat olish bilan bog‘liq xarajatlari Davlat budjeti mablag‘lari hisobidan moliyalashtiriladi.

4-bob. Nomzodlarga sertifikat berish uchun yakuniy sinovlarni tashkil etish va o‘tkazish

29. Nomzodlar uchun yakuniy sinovlarni o‘tkazish jadvallarini ishlab chiqish, tasdiqlash, sinovlarni o‘tkazish, ularning natijalarini e’lon qilish Markaz tomonidan amalga oshiriladi.

30. Yakuniy sinovlarni o‘tkazish sanasi sinovlar o‘tkaziladigan kundan kamida yetti kun oldin e’lon qilinadi.

Markaz yakuniy sinov o‘tkaziladigan sana va joy to‘g‘risidagi ma’lumotni maxsus portal orqali nomzodning shaxsiy kabinetiga yuboradi.

31. Agar nomzod turli sabablarga ko‘ra yakuniy sinovda ishtirok eta olmaydigan bo‘lsa, Markazga yakuniy sinov o‘tkaziladigan kundan kamida uch kun oldin yozma yoki elektron shaklda murojaat etishi lozim.

Uzrli sababga ko‘ra (kasalligi yoki oila a’zolarining vafot etganligini tasdiqlovchi hujjatni taqdim etganda) yakuniy sinovlarda qatnasha olmagan nomzod yakuniy sinov boshlangan kundan boshlab besh ish kuni mobaynida ushbu holatni tasdiqlovchi hujjatlarni Markazga bevosita yoki elektron shaklda taqdim etishi lozim.

Bunda nomzodning navbatdagi yakuniy sinovga kiritilishi ta’minlanadi.

32. Yakuniy sinov topshiriqlari O‘zbekiston Respublikasi Maktabgacha va maktab ta’limi vazirligi tomonidan tasdiqlangan dasturlar asosida jamoada ishlash va ota-onalar bilan muloqot qilish, boshqaruv, moliyaviy hisob-kitoblarni amalga oshirish hamda axborot-kommunikatsiya texnologiyalari ko‘nikmalarini aniqlash yuzasidan Institut tomonidan yetakchi olimlar va malakali mutaxassislar, shuningdek, nodavlat tashkilotlar vakillarini shartnoma asosida jalb qilgan holda ishlab chiqiladi.

Yakuniy sinov topshiriqlari Institut tomonidan ekspertizadan o‘tkaziladi.

33. Ishlab chiqilgan yakuniy sinov topshiriqlari asosida Markaz tomonidan yakuniy test va keys savollari bazasi shakllantiriladi.

34. Yakuniy sinovlar sanitariya qoidalari, normalari va gigiyena normativlariga, texnika va yongin xavfsizligi qoidalariga qat’iy rioya qilgan holda o‘tkaziladi.

35. Nomzodlar uchun yakuniy sinovlar ularning bevosita ishtirokida maxsus jihozlangan xonalarda qog‘oz yoki elektron shaklda o‘tkazilishi mumkin.

36. Yakuniy sinovlar 25 ta test, keys hamda amaliy topshiriqlardan iborat bo‘ladi.

37. Test sinovlari uchun 50 ball, keys topshiriqlari uchun 10 ball va amaliy topshiriqlar uchun 40 ball (jami 100 ball) beriladi.

70 ball va undan yuqori natija ko‘rsatgan nomzodlar yakuniy sinovni muvaffaqiyatli topshirgan hisoblanadi va ularga sertifikat beriladi.

Test sinovlari va keys topshiriqlarini bajarish uchun jami 120 daqiqa vaqt beriladi.

Amaliy topshiriqlar nomzod tomonidan ijodiy ish shaklida taqdim etiladi va imtihon komissiyasi tomonidan baholanadi.

O‘zbekiston Respublikasi Maktabgacha va maktab ta’limi vazirligi tomonidan amaliy topshiriqlarni baholash va imtihon komissiyasini tashkil etish va o‘tkazish tartibi belgilanadi.

38. Belgilangan ballni to‘play olmagan nomzodlar bir yil ichida navbatdagi bitta yakuniy sinovlarda to‘lov undirilmagan holda ishtirok etish huquqiga ega.

Ikkinchi marta ham yakuniy sinovlarda belgilangan ballni to‘play olmagan nomzodlar qayta o‘quv kursida o‘qiganidan so‘ng yakuniy sinovlarda ishtirok etish imkoniyatiga ega bo‘ladi.

Direktorlar yakuniy sinovlarda belgilangan ballni to‘play olmagan taqdirda o‘rnatilgan tartibda lavozimidan ozod etiladi.

39. Nomzodlar yakuniy sinovlarni topshirishga pasport (identifikatsiya ID-kartasi) yoki shaxsni tasdiqlovchi boshqa hujjat asosida qo‘yiladi.

Pasporti (identifikatsiya ID-kartasi) yoki shaxsni tasdiqlovchi boshqa hujjati bo‘lmagan yoxud test sinoviga kechikkan nomzodlar test sinoviga kelmagan deb hisoblanadilar va navbatdagi test sinovini topshirishga ruxsat etilgan nomzodlar ro‘yxatiga o‘tkaziladi.

40. Nomzod uzrsiz sababga ko‘ra yakuniy sinovda ishtirok etmagan bo‘lsa, u yakuniy sinovdan o‘tmagan hisoblanadi.

41. Yakuniy sinovlar jarayonida xolis kuzatuvchilarning ishtirok etishiga ruxsat beriladi.

Bunda xolis kuzatuvchilar sifatida O‘zbekiston Respublikasi Maktabgacha va maktab ta’limi vazirligi tizimidagi mas’ul xodimlar, nodavlat tashkilotlar hamda ommaviy axborot vositalari vakillari ishtirok etishlari mumkin.

42. Yakuniy sinov boshlanishidan oldin Markazning mas’ul xodimi quyidagilarni amalga oshirishi lozim:

nomzodlarni sinovlarni o‘tkazish tartibi va davom etish vaqti haqida xabardor qilish;

nomzodlar tomonidan aloqa vositalarini o‘chirishlari va topshirishlarini ta’minlash;

sinov jarayonida foydalanish taqiqlangan barcha predmetlarni o‘z ixtiyorlari bilan topshirishlarini taklif etish;

sinov o‘tkazilayotgan to‘liq vaqt davomida belgilangan tartiblarga qat’iy rioya qilinishini ta’minlash;

sinovni o‘tkazish tartibini buzgan nomzodlarni tegishli dalolatnoma tuzgan holda sinovdan chetlashtirish.

43. Yakuniy sinov vaqtida normativ-huquqiy hujjatlardan, ma’lumot va maxsus adabiyotdan foydalanish, so‘zlashish, o‘zaro axborot almashish, aloqa vositalardan foydalanish, sinov materiallari yoki ularning mazmuniga oid bo‘lgan ma’lumotlarni olib chiqish taqiqlanadi.

Mazkur talablarni buzgan nomzodlar sinovni topshirmagan deb hisoblanadilar va ularning ko‘rsatgan natijalari baholanmaydi.

44. Yakuniy sinovni o‘tkazish jarayoni videoyozuvda qayd qilinadi. Videoyozuv Markazda olti oy davomida saqlanadi.

45. Nomzodlarning yakuniy sinov natijalari sinovlar o‘tkazilgan kuni maxsus portal orqali e’lon qilinadi.

46. Sertifikat 5 yil davomida amal qiladi. Nomzodlar sertifikatning amal qilish muddati davomida amal qilish muddatini uzaytirish maqsadida qayta menejerlik sertifikatini olish bo‘yicha yakuniy sinovlarda ishtirok etishlari mumkin.

47. Markaz menejerlik sertifikatlarining elektron hisobini yuritish yuzasidan javobgar hisoblanadi.

5-bob. Yakuniy sinov natijalari yuzasidan apellatsiya berish

48. Yakuniy sinov natijalaridan norozi bo‘lgan nomzodlar natijalar e’lon qilingan vaqtdan boshlab besh ish kuni mobaynida apellatsiya komissiyasiga yozma yoki elektron shaklda ariza (shikoyat) berishlari mumkin.

49. Apellatsiya komissiyasi yakuniy sinov boshlangandan keyin ikki kun ichida Institut rektorining buyrug‘i asosida 5 yoki 7 nafardan iborat tarkibda tuziladi.

50. Apellatsiya komissiyasining tarkibi va ish tartibi apellatsiya komissiyasini tashkil etish to‘g‘risidagi buyruqda belgilanadi.

Apellatsiya komissiyasining murojaatlarni masofadan turib onlayn tarzda ko‘rib chiqish muddatlari to‘g‘risidagi ma’lumotlar maxsus portalga joylashtiriladi.

51. Ariza (shikoyat) ro‘yxatga olingandan so‘ng ikki hafta mobaynida yozma ravishda apellatsiya natijasi ariza (shikoyat) beruvchiga xabardor qilinadi.

52. Apellatsiya komissiyasi tarkibiga yakuniy sinov jarayonlarini o‘tkazishda ishtirok etgan shaxslar kiritilmaydi.

53. Apellatsiya komissiyasi muammoli holatlarga aniqlik kiritish maqsadida jamoatchilik asosida malakali mutaxassislarni jalb etishi mumkin.

54. Apellatsiya komissiyasi yig‘ilishida komissiya a’zolarining uchdan ikki qismi ishtirok etsa, uning qabul qilgan qarori qonuniy kuchga ega bo‘ladi.

55. Apellatsiya komissiyasi tomonidan nomzodning murojaati ko‘rib chiqilgandan so‘ng xulosalash jarayonida bevosita yoki masofadan turib onlayn tarzda ishtirok etishi mumkin.

56. Apellatsiyani ko‘rib chiqish natijasi bo‘yicha apellatsiya komissiyasi quyidagi qarorlardan birini qabul qiladi:

to‘plangan ballarni o‘zgarishsiz qoldirish;

to‘plangan ballarni o‘zgartirish;

yakuniy sinovni qayta o‘tkazish.

57. Apellatsiya komissiyasi qarori nusxasi ariza (shikoyat) beruvchiga apellatsiya komissiyasi qarori chiqqan kundan e’tiboran uch kun muddatda taqdim etiladi.

58. Takroriy apellatsiyaga yo‘l qo‘yilmaydi.

Nomzodlar apellatsiya komissiyasining qarori yuzasidan qonunchilik hujjatlarida belgilangan tartibda sudga shikoyat qilishi mumkin.

6-bob. Sertifikatni berish tartibi

59. Yakuniy sinovda ijobiy natijaga erishgan nomzodga yakuniy sinov natijalari e’lon qilingan kundan boshlab bir hafta mobaynida Institut rektorining buyrug‘i asosida mazkur Nizomga 2-ilovaga muvofiq shaklda sertifikat beriladi.

Nomzod sertifikatni shaxsiy kabineti orqali yuklab olishi mumkin.

60. Sertifikatlar reyestri Markaz tomonidan yuritiladi.

Sertifikatlar reyestrida quyidagilar ko‘rsatilishi lozim:

nomzodning familiyasi, ismi, otasining ismi;

Institutning sertifikat berish to‘g‘risidagi buyrug‘ining sanasi va tartib raqami;

hisobga olish seriyasi va tartib raqami;

berilgan sanasi;

amal qilish muddati.

61. Sertifikatning haqiqiyligi to‘g‘risidagi ma’lumotlarni maxsus portal orqali tekshirish imkoniyati yaratiladi.

7-bob. Yakunlovchi qoidalar

62. Institut tomonidan ariza beruvchilar to‘g‘risidagi shaxsiy ma’lumotlar maxfiyligi ta’minlanadi. Qonunchilik hujjatlarida belgilangan tartibda vakolatli davlat organlari tomonidan rasmiy murojaat bo‘lgan taqdirda, ariza beruvchilar to‘g‘risidagi ma’lumotlar taqdim etiladi.

63. Mazkur Nizomni qo‘llashda yuzaga keladigan nizolar qonunchilik hujjatlarida belgilangan tartibda hal etiladi.

64. Ushbu Nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladilar.

Davlat umumiy o‘rta ta’lim muassasalari direktori lavozimiga nomzodlarni menejerlik o‘quv kurslarida o‘qitish va ularga menejerlik sertifikatini berish tartibi to‘g‘risidagi nizomga

1-ILOVA

O‘quv kurslarini tashkil etish

SXEMASI

Davlat umumiy o‘rta ta’lim muassasalari direktori lavozimiga nomzodlarni menejerlik o‘quv kurslarida o‘qitish va ularga menejerlik sertifikatini berish tartibi to‘g‘risidagi nizomga

2-ILOVA

(Qonunchilik ma’lumotlari milliy bazasi, 25.12.2023-y., 09/23/681/0964-son)