Vazirlik “Yil o‘qituvchisi” natijalari nega o‘zgarib qolganiga izoh berdi

Avvalroq, ijtimoiy tarmoqlarda “Yil o‘qituvchisi” natijalari sotilyaptimi?” degan mazmundagi xabarlar tarqalgani, o‘qituvchilarning attestatsiya imtihonida “Yil o‘qituvchisi” tanlovi uchun yiqqan ballari 3 kundan so‘ng g‘ayrioddiy tarzda pasaytirib qo‘yilgani haqida xabar bergandik.

Maktabgacha va maktab ta’limi vazirligi holat bo‘yicha rasmiy bayonot berib, aslida nima bo‘lganini birma-bir izohlab berishga harakat qildi.

Ma’lumki, O‘zbekiston Respublikasi Vazirlar Mahkamasining 2025-yil 28-apreldagi tegishli qaroriga asosan, ayni damda o‘tkazilayotgan malaka (test) sinovlari natijalari “Yil o‘qituvchisi” tanlovining birinchi — saralash bosqichi sifatida ham belgilangan.

Birinchi va oliy toifali pedagoglarning malaka (test) sinov natijalari tanlovda ishtirok etish talablariga mos kelgan taqdirda, ular umumta’lim sohasi xodimlari o‘rtasida o‘tkaziladigan “Yil o‘qituvchisi” tanloviga nomzodlar safiga qo‘shiladi.

Vazirlik holatni quyidagicha izohladi

Test sinovlari jarayonida pedagoglar platformada test topshiriqlarini boshlashdan avval, kompyuter ekranida maxsus eslatma va xabarnoma paydo bo‘ladi. Unda sinov natijalarining “Yil o‘qituvchisi” tanlovining saralash bosqichi sifatida hisoblanishi haqida ma’lumot berilgan.

Pedagoglar ushbu xabarnoma bilan tanishganlaridan so‘ng, sinov topshiriqlarini bajarishni boshlaydilar. Test yakunlangach, platforma avtomatik tarzda ikki turdagi natijani taqdim etadi:

• Malaka toifasi attestatsiyasi natijalari — odatdagi baholash tizimi bo‘yicha;

• “Yil o‘qituvchisi” tanlovi bo‘yicha natijalar — to‘g‘ri javoblar soniga nisbatan tanlov shkalasi asosida hisoblangan ball ko‘rinishida.
  
  
  

Ijtimoiy tarmoqlarda tarqalgan pedagogning pedagog.uzedu.uz platformasidagi shaxsiy sahifasidan olingan rasmda quyidagilarni ko‘rishimiz mumkin:

“Yil o‘qituvchisi” tanlovi bo‘yicha test natijalari hisoblanishiga doir izoh

Attestatsiya va “Yil o‘qituvchisi” tanlovi doirasida o‘tkazilgan test sinovlarining dastlabki natijalari bo‘yicha quyidagilarni ma’lum qilamiz:

Test topshiriqlarining birinchi bloki 40 ta savoldan iborat bo‘lib, shundan 35 tasi mutaxassislik (asosiy) faniga, 5 tasi kasbiy standartga oid savollardir. Bu savollar test variantlari avtomatik generatsiya qilinish jarayonida aralashtirilgan holda joylashtirilgan.

Natijalarni hisoblashda 1–35-gacha bo‘lgan savollarga berilgan to‘g‘ri javoblar 3.1 ballga, 36–40-gacha bo‘lgan savollarga berilgan to‘g‘ri javoblar esa 1.1 ballga ko‘paytirilishi kerak edi.

Ammo variantlarda 1–40 raqamlar oralig‘ida mutaxassislik va kasbiy standartga oid savollar aralashib tushgani kuzatilgan.

Natijada ba’zi hollarda kasbiy standart savollari uchun 3.1 ball, mutaxassislik fanlari uchun esa 1.1 ball bilan hisoblangan.

Keyingi bosqichda tizimda ushbu texnik xatolik bartaraf etilgan pedagogning natijalariga bloklar kesimida (mutaxassislik va kasbiy standart alohida) qayta aniqlik kiritildi. Natijalar standart koeffitsiyentlar asosida qayta joylashtirilib chiqildi.

Shu bilan birga, bu tuzatishlar attestatsiya natijalariga va to‘g‘ri javoblar soniga ta’sir ko‘rsatmagan.

Ikkinchi bosqich pedagogik mahorat bo‘yicha (10 ta test topshirig‘i) har bir to‘g‘ri javob uchun — 2,1 ball berilgan. Pedagogik mahoratdan tushgan 10 ta savolda barcha ballar to‘g‘ri joylashtirilgan.

Eslatib o‘tamiz, pedagoglarga tushgan savollar soni — mutaxassislik fanidan 35 ta va kasbiy standartdan 5 ta — hech qanday o‘zgarishga uchramagan.