Psixolog hamda CHQBT rahbarlarining ham oyligi oshadimi?

Savol

Maktabdagi rahbar xodimlarning oylik maoshlari 1-sentyabrdan boshlab oshar ekan. Bunda psixolog va CHQBT rahbarlari maoshi ham oshadimi? Ular ham rahbar xodim-ku, shunday emasmi?

Javob

O‘zbekiston Respublikasi Prezidentining “Maktabgacha va maktab ta’limi sohasida boshqaruv tizimi samaradorligini oshirish chora-tadbirlari to‘g‘risida”gi farmoni bilan 2025-yil 1-sentyabrdan boshlab maktab direktorlarining oylik maoshi 20 foizga, direktor o‘rinbosarlarining oylik maoshi esa 15 foizga oshirilmoqda.

2026-yil 1-yanvardan boshlab rahbar xodimlarning maoshi yana oshadi. Chunki, direktor va uning o‘rinbosarlariga faoliyat samaradorligi ko‘rsatkichlari (KPI) natijasiga ko‘ra bazaviy tarif stavkalariga nisbatan tegishlicha 20 va 10 foiz miqdorida har oylik ustamalar belgilanmoqda.

Psixologlarning ham maoshi oshiriladimi?

Ma’lumki, prezident farmonida direktor va uning o‘rinbosarlari oylik maoshlarini oshirish haqida so‘z borgan. Psixologlar esa direktor o‘rinbosari hisoblanmaydi. 

Shu sababli, ularning oylik maoshi oshirilmaydi. Ammo joriy yilning bahorgi attestatsiyasidan boshlab maktab psixologlari malaka test sinovlarida ishtirok etish orqali toifa olish va shu orqali oylik ish haqini oshirish imkoniyatiga ega bo‘ladilar.

CHQBT rahbarlari maoshi oshiriladimi?

Xabaringiz bo‘lsa, Xalq ta’limi vazirining 2019-yil 28-dekabrdagi 406-sonli buyrug‘i bilan CHQBT rahbari lavozimi Vatanparvarlik ruhida yoshlarni tayyorlash bo‘yicha direktor o‘rinbosari lavozimiga o‘zgartirilib, ularga direktor o‘rinbosari maqomi berilgandi.

O‘zbekiston Respublikasi Prezidentining 2024-yil 15-noyabrdagi PQ-393-son qarori bilan 2025-yil 1-iyundan boshlab ta’lim tashkilotlaridagi Vatanparvarlik ruhida yoshlarni tayyorlash bo‘yicha direktor o‘rinbosari — harbiy chaqiriqqacha tayyorgarlik rahbari lavozimi tugatilib, ularning shtat birligi Mudofaa vazirligiga o‘tkazilmoqda.

Ushbu shtat birliklari hisobidan esa CHQBT rahbari lavozimi joriy etilishi belgilangan. Ya’ni, 2025-yil 1-iyundan boshlab ular direktor o‘rinbosari hisoblanmaydi.

Shu sababli, 2025-yil 1-sentyabrdan boshlab CHQBT rahbarlarining ham oylik maoshi oshirilmaydi. 

Ularning oylik maoshlari 2025-yil 1-sentyabrga qadar ishlab chiqilishi reja qilinayotgan CHQBT rahbarlarining faoliyati samaradorligini baholash ko‘rsatkichlari (KPI)ga ko‘ra oshirib borilishi mumkin.