Kelasi o‘quv yilidan bog‘cha tarbiyachilari uchun oliygohda o‘qish muddati to‘rt yildan uch yilga qisqartiriladi

Ma’lumki, maktabgacha ta’lim yo‘nalishida o‘rta maxsus ma’lumotga ega pedagog kadrlar uchun o‘quv jarayonini dual ta’lim shaklida tashkil etish tartibini tasdiqlangandi.

Ya’ni, bog‘cha tarbiyachilariga ishlab turib oliy ma’lumot olish imkoni yaratilgan. Joriy yil ularning 7 ming nafari oliygohga kirdi.

Bunda maktabgacha ta’lim tashkilotlarida faoliyat yuritayotgan tarbiyachilar va tarbiyachi yordamchilari ish faoliyatidan ajralmagan holda bakalavriat bosqichida tahsil olishi belgilangan.

Bu orqali ular haftaning besh kuni o‘zi ishlayotgan maktabgacha ta’lim tashkilotida amaliy faoliyat olib borib, bir kun esa oliy ta’lim tashkilotida auditoriya mashg‘ulotlarida qatnashmoqda.

Endilikda esa, kelasi o‘quv yilidan tarbiyachilar uchun pedagogika oliygohlaridagi o‘qish muddati to‘rt yildan uch yilga qisqaradi. Shuningdek, 2027-yil 1-yanvardan 2-3 yoshli farzandini oilaviy bog‘chaga bergan ishli onalarning badal puli budjet hisobidan qoplab beriladi.

Bu haqda bugun, 30-sentyabr kuni Prezident Shavkat Mirziyoyev o‘qituvchi va murabbiylar bilan uchrashuvda ma’lum qildi.