Surxondaryoda bog‘chalarga oziq-ovqat yetkazib berish bilan bog‘liq korrupsiyaviy holat fosh etildi

Surxondaryo viloyatida davlat maktabgacha ta’lim tashkilotlariga oziq-ovqat mahsulotlari yetkazib berish jarayonida pora talab qilgan bog‘cha direktori qo‘lga olindi.

Ma’lum qilinishicha, Surxondaryo viloyati Ichki ishlar boshqarmasi boshlig‘i nomiga kelib tushgan murojaatda davlat maktabgacha ta’lim tashkilotlariga shartnoma asosida yetkazib berilayotgan oziq-ovqat mahsulotlari qabul qilinganligini tasdiqlovchi hisobotlarga imzo va muhr qo‘yib berish evaziga noqonuniy pul talab qilinayotgani haqida xabar berilgan.

Mazkur murojaat asosida joriy yilning 20-iyul kuni Surxondaryo viloyati Ichki ishlar boshqarmasi Tezkor qidiruv xizmati Uyushgan jinoyatchilikka qarshi kurashish boshqarmasi Korrupsiyaviy jinoyatlarga qarshi kurashish bo‘limi hamda Iqtisodiy jinoyatlarga qarshi kurashish departamentining Jarqo‘rg‘on tuman bo‘limi xodimlari hamkorligida tezkor tadbir o‘tkazilgan.

Tadbir davomida 1987-yilda Jarqo‘rg‘on tumanida tug‘ilgan gumonlanuvchi o‘zining xizmat mavqeidan foydalanib, o‘zi rahbarlik qilib kelayotgan Jarqo‘rg‘on tumanidagi davlat maktabgacha ta’lim tashkiloti hamda yana bir davlat maktabgacha ta’lim tashkilotiga “Toshmurod Oydin” MChJ tomonidan shartnoma asosida yetkazib berilishi lozim bo‘lgan mavsumiy taomnoma bo‘yicha oziq-ovqat mahsulotlari to‘liq qabul qilinganligini tasdiqlovchi har oyning 10 kunlik hisobotlariga imzo va muhr qo‘yib berishni va’da qilgan.

Buning evaziga u har bir tashkilot uchun 7 million so‘mdan, jami 14 million so‘m pora talab qilgani aniqlangan. Gumonlanuvchi ushbu pul mablag‘larini olayotgan vaqtida tezkor tadbir davomida ashyoviy dalillar bilan qo‘lga olingan.

Mazkur holat yuzasidan gumonlanuvchi va boshqa shaxslarga nisbatan O‘zbekiston Respublikasi Jinoyat kodeksining 210-moddasi ikkinchi qismi “v” va “g” bandlari bilan jinoyat ishi qo‘zg‘atilgan. Hozirda mazkur ish yuzasidan tergov harakatlari davom ettirilmoqda.