May oyidan boshlab farzandi maktabga bormaydigan oilalarning “bola puli” miqdori kamaytiriladi

2025-yil 27-fevralda Vazirlar Mahkamasining “Oilalarni kambag‘allikdan chiqarishga qaratilgan ko‘mak choralarini ko‘rsatishga doir tartib-taomillarni takomillashtirish to‘g‘risida”gi qarori imzolangan.

Mazkur qaror bilan tasdiqlangan nizomga ko‘ra 2025-yil 1-maydan boshlab respublikaning barcha hududlarida kambag‘al oilalarga ko‘mak choralari ijtimoiy shartnoma asosida berilishi belgilangan.

Bunda kam ta’minlangan oilalarga ular bilan tuziladigan ijtimoiy shartnomada oilaning ta’lim tashkilotlarida o‘qiydigan a’zolarini darslarda muntazam qatnashishini ta’minlash majburiyati ham yuklatilgan.

Agar ushbu shart bajarilmasa, kam ta’minlangan oilalar farzandlari uchun to‘lanadigan nafaqa miqdori kamaytiriladi.

Ushbu tartibga ko‘ra, ijtimoiy shartnomada nazarda tutilgan majburiyatlarning bajarilishi “mahalla yettiligi” tomonidan muntazam ravishda monitoring qilib boriladi.

“Mahalla yettiligi” tomonidan amalga oshiriladigan monitoring natijasiga doir ma’lumotlar har oyda mahalla raisi tomonidan “Raqamli mahalla” elektron platformasiga kiritib boriladi. 

Bunda monitoring yakuni bo‘yicha kambag‘al oilaning har bir muomalaga layoqatli a’zosi tomonidan:

• ijtimoiy shartnomada nazarda tutilgan majburiyatlarning lozim darajada bajarilayotganligi aniqlangan taqdirda, tegishli ko‘mak choralarini ko‘rsatish davom ettiriladi;

• ijtimoiy shartnomada nazarda tutilgan majburiyatlarning bajarilmaganligi aniqlangan taqdirda, bu haqida dalolatnoma shu kunning o‘zida rasmiylashtiriladi hamda “Raqamli mahalla” elektron platformasi orqali SMS-xabarnoma shaklida va “mahalla yettiligi” vakili tomonidan yozma shaklda tegishli majburiyatning o‘n besh ish kuni davomida bajarilishini ta’minlash lozimligi bo‘yicha ogohlantirish beriladi.

Kerakli choralar ko‘rilganidan keyin ham jtimoiy shartnomada nazarda tutilgan majburiyatlar bajarilmasa, oilaga tegishli ko‘mak choralari ko‘rsatishni to‘xtatish yoki kam ta’minlangan oilalar uchun ijtimoiy yordam miqdorini kamaytirish bo‘yicha “mahalla yettiligi”ga taklif kiritiladi.