1-sinf uchun bir vaqtning o‘zida bir nechta maktabga ariza topshirsa bo‘ladimi?

Joriy yilda birinchi sinfga qabul jarayonlari 20-iyun kunidan boshlangan. Bunda qabul jarayonlari ikkita bosqichda amalga oshiriladi. 

Birinchi bosqich 20-iyundan 31-iyulgacha bo‘lib, bunda arizalar biriktirilgan mikrohudud doirasida qabul qilinadi. Ikkinchi bosqichda, ya’ni mikrohududdan tashqari qabul jarayonlari maktabning quvvati va imkoniyatlariga qarab amalga oshiriladi.

Qoidalarga ko‘ra, bir vaqtning o‘zida faqat bitta maktabga ariza topshirish mumkin. Biroq, fuqaro 31-iyulgacha o‘zining mikrohududidagi maktabga (asosiy kvota) ariza topshirishi, so‘ngra 1-avgustdan boshlab mikrohududidan tashqaridagi maktabga (qo‘shimcha kvota) ariza berishi mumkin. Demak, arizalar bir vaqtning o‘zida emas, ketma-ket yuborilishi mumkin.

Nima uchun birinchi navbatda mikrohudud bo‘yicha qabul amalga oshiriladi?

Buning bir necha sabablari bor. Birinchidan, bu ota-onalarga qulaylik yaratish, ya’ni farzandining uyiga yaqin maktabga borishini ta’minlash. Ikkinchidan, bu “Ta’lim to‘g‘risida”gi qonun bilan kafolatlangan. Uchinchidan, yosh bolaning uzoq masofaga qatnamasligi uning darslarni o‘zlashtirishiga, uyquga to‘yishiga va sog‘lig‘iga ijobiy ta’sir qiladi.

Mikrohududdagi maktabda kerakli ta’lim tili bo‘lmasa, nima qilish kerak?

Ba’zan mikrohududga biriktirilgan maktabda fuqarolar istaydigan ta’lim tilidagi sinflar ochilmasligi mumkin. Bunday vaziyatda, tuman shtabi tomonidan yashash manzilida ta’lim tili mos kelmaydigan fuqarolar uchun so‘ralgan tilda dars beriladigan boshqa maktabga ariza yuborish imkoniyati yaratiladi.

Ushbu savolga Maktabgacha va maktab ta’limi vazirligi mas’ullari javob bergan.