Ayol pedagoglar uchun voleybol o‘tkazilib, g‘oliblarga “Damas” avtomobili va 150 mln so‘mgacha pul beriladi

Joriy yilning aprel oyidan boshlab, ayol o‘qituvchilar va maktabgacha ta’lim xodimlari o‘rtasida voleybol bo‘yicha “Vazir kubogi” musobaqasi bo‘lib o‘tmoqda. 

Musobaqa uch bosqichda tashkil etildi. Tuman (shahar) bosqichi 20–30-aprel kunlari, hududiy bosqich Qoraqalpog‘iston Respublikasi, viloyatlar va Toshkent shahrida 5–15-may kunlari o‘tkazildi. Ayni paytda esa respublika bosqichi davom etmoqda.

Bugundan boshlab musobaqaning respublika bosqichiga start berildi. Maktabgacha va maktab ta’limi vazirligi Axborot xizmati rahbari Dilfuza Sobirovaning xalqtaliminfo.uz'ga ma’lum qilishicha, 14 mingdan ortiq ta’lim muassasalarining 110 452 nafar ayol xodimlarini o‘zida qamrab olgan ushbu musobaqaning Respublika bosqichi ayni kunlarda Namangan shahrida o‘tkazilmoqda. 

Unda barcha hududlarda g‘oliblikni qo‘lga kiritgan 14 ta jamoadan 112 nafar ayol o‘qituvchilar ishtirok etmoqda. 

Bunda musobaqaning respublika bosqichida: 

• 1-o‘rin g‘olib jamoasiga 150 mln so‘m; 

• 2-o‘rin g‘olib jamoasiga 100 mln so‘m; 

• 3-o‘rin g‘olib jamoasiga 70 mln so‘m pul mukofoti topshiriladi. 

Shuningdek, barcha g‘olib jamoalarning har biriga “Damas” avtomobillari ham topshiriladi. 

Eslatib o‘tamiz, avvalroq o‘quvchi-qizlar o‘rtasida futbol bo‘yicha “Maktabgacha va maktab ta’limi vaziri kubogi” musobaqasi tashkil etilib, g‘olib jamoaga “Damas” avtomashinasi va 250 mln so‘mgacha pul mukofoti berilgandi.