8-sinf o‘quvchisi ona bo‘lgani aytilmoqda

15:00 / 10.05.2024 3.49k

Ijtimoiy tarmoqlarda Samarqand viloyatidagi 22-maktabning 8-sinf o‘quvchisi o‘g‘il farzandli bo‘lgani haqida xabarlar tarqalmoqda.

Ayni vaqtda Bolalar ombudsmani mazkur holatni o‘rganib, o‘z kuzatuviga olgan.

Aniqlanishicha, Samarqand viloyatidagi maktabning 8-sinf o‘quvchisi, voyaga yetmagan (2009-yilda tug‘ilgan) P.Z. 2023-yil avgust oyida o‘ziga avvaldan tanish bo‘lgan, 2006-yilda tug‘ilgan Sh.E. bilan yaqin munosabatda bo‘lgan.

Oqibatda u homilador bo‘lgan va 2024-yil 6-may kuni shifoxonada chaqaloqni dunyoga keltirgan.

Mazkur holat yuzasidan (voyaga yetmagan qizning yoshidan kelib chiqib, ariza bilan murojaat qilinmagan bo‘lsa-da) tuman IIB tomonidan JKning 128-moddasi 1-qismi (O‘n olti yoshga to‘lmagan shaxs bilan jinsiy aloqa qilish) bilan jinoyat ishi qo‘zg‘atilgan.

Hozirda dastlabki tergov harakatlari olib borilmoqda.

“Shu bilan birga, bunday toifadagi jinoyat ishi doirasida voyaga yetmagan jabrlanuvchi shaxsiga oid bo‘lgan boshqa ma’lumotlarni oshkor qilish va tarqatish qonunan taqiqlangan hamda bola manfaatlariga zid ekanligini eslatib o‘tamiz”, deyiladi Bolalar ombudsmani xabarida.

Ayni vaqtda holat huquqni muhofaza qiluvchi organlar tomonidan o‘rganilmoqda.