“Endi o‘qituvchilar ishini virtual yordamchi bajaradi” — Sherzod Shermatov

Prezident Shavkat Mirziyoyev 1-dekabr kuni sog‘liqni saqlash, ta’lim, transport va kosmos sohalarida sun’iy intellekt texnologiyalarini joriy qilish bo‘yicha olib borilayotgan ishlar taqdimoti bilan tanishdi.

Raqamli texnologiyalar vaziri Sherzod Shermatov qilgan taqdimotda ta’lim sohasida sun’iy intellekt texnologiyalarini joriy qilish yuzasidan belgilangan vazifalar yuzasidan ham takliflar eshitildi.

Berilgan takliflarga ko‘ra maktab ta’limi uchun sun’iy intellektga asoslangan platforma joriy qilinadi. Bunda o‘qituvchining virtual yordamchisi ishlab chiqiladi va platformaga integratsiya qilinadi. 

Ushbu yechim o‘qituvchilarga mavzuga doir ma’ruza matnlari, taqdimotlar, testlar, dars rejalarini tuzish, imtihon jarayonlarini nazorat qilishda ko‘maklashadi.

Kelgusi o‘quv yilidan maktab, texnikum va oliygohlarda o‘quvchi va talabalarga sun’iy intellektni o‘qitish boshlanadi. Buning uchun informatika o‘qituvchilari tayyorlanayotgani qayd etildi. 

Lekin faqat ularni emas, butun maktab jamoasini sun’iy intellektdan foydalanishga o‘rgatilib, o‘qituvchilarning yuklamasini kamaytirish kerakligi ko‘rsatib o‘tildi. Shunda o‘qituvchida o‘z ustida ishlashga ko‘proq vaqt qoladi, deya ta’kidlandi yig‘ilishda.