Maktab xotin-qizlar qo‘mitasi raisiga ustama belgilash mumkinmi?

Savol

Umumta’lim maktablaridagi boshlang‘ich xotin-qizlar qo‘mitasi raisiga direktor jamg‘armasi hisobidan ustama to‘lanishi bo‘yicha XTVning buyrug‘i bor edi. Lekin, amalda bunga e’tibor qaratilmayapti.  Shu bo‘yicha to‘liqroq ma’lumot bersangiz.

Javob

Haqiqatdan ham Xalq ta’limi vazirining 2022-yil 31-maydagi 174-sonli buyrug‘i bilan umumta’lim muassasalarida oila va xotin-qizlar davlat qo‘mitasining boshlang‘ich tashkilotlari faoliyatini yo‘lga qo‘yish nazarda tutilgan.

Mazkur buyruqning 2-band, 3-xatboshida boshlang‘ich tashkilot raisini o‘rnatilgan tartib bilan ish haqiga qo‘shimcha ustama belgilash orqali moddiy rag‘batlantirib borish belgilangan.

Ammo boshlang‘ich tashkilot raisini aynan qaysi manbalar hisobidan rag‘batlantirish borasida to‘liq tushuntirish berilmagan.

Umumta’lim muassasasi xodimlariga direktor jamg‘armasi hisobidan qo‘shimcha ustamalar tayinlash Vazirlar Mahkamasining 2019-yil 30-sentyabrdagi 823-sonli qarori bilan tasdiqlangan nizom bilan tartibga solingan.

Ushbu nizomda belgilangan baholash mezonlarida esa umumta’lim muassasasi xotin-qizlar boshlang‘ich tashkiloti raislari uchun alohida imtiyoz yoki ustamalar belgilash nazarda tutilmagan.

Shu sababli, xotin-qizlar boshlang‘ich tashkilot raisini direktor jamg‘armasi hisobidan rag‘batlantirishning imkoni yo‘q.

Ammo maktabning byudjetdan tashqari jamg‘ariladigan mablag‘lari hisobidan rag‘batlantirish mumkin. Jamg‘arma mablag‘laridan foydalanish Vazirlar Mahkamasining 2021-yil 27-apreldagi 243-son qarori bilan tasdiqlangan nizom bilan tartibga solinadi.