B2 sertifikatiga ega bo‘lmagan xorijiy til o‘qituvchilari ishdan bo‘shatiladimi?

Savol

Yangi o‘quv yilidan milliy yoki unga tenglashtirilgan mos darajadagi xalqaro sertifikatga ega bo‘lmagan xorijiy til o‘qituvchilarini tarifikatsiya ro‘yxatiga kiritilmaydi deyishyapti. 

Yuqoridan shunday topshiriq bo‘libdi. Sentyabrgacha B2 sertifikati yo‘qlar ishdan bo‘shatilar ekan. Bu talab muddati uzaytirilmaganmidi?

Javob

O‘zbekiston Respublikasi Prezidentining 2021-yil 19-maydagi PQ-5117-sonli Qarorida 15 ta milliy yoki unga tenglashtirilgan mos darajadagi xalqaro tan olingan sertifikatga ega xorijiy tillar (ingliz, fransuz, nemis, ispan, italyan, arab, xitoy, yapon, koreys, turk, fors, pushtu, dari, urdu, hind tillari) xorijiy til sifatida ko‘rsatilgan.

Vazirlar Mahkamasining 2021-yil 19-maydagi 312-sonli qarori 9-bandiga ko‘ra, 2022-2023 o‘quv yilidan boshlab, davlat ta’lim muassasalarining xorijiy tillar o‘qituvchilari lavozimlariga ishga yangi qabul qilinayotgan talabgor kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lishi lozimligi belgilangan.

2022/2023-o‘quv yilida maktablarda xorijiy tillar o‘qituvchilari yetishmaganligi sababli, B2 darajadagi milliy yoki xalqaro sertifikatga ega bo‘lmagan chet tili fani o‘qituvchilarini ishga qabul qilinmaslik xususidagi talab 2023/2024-o‘quv yilidan kuchga kirishi belgilangan.

2024-2025 o‘quv yiliga qadar esa maktablarda faoliyat yuritayotgan barcha xorijiy tillar o‘qituvchilari kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lish talabi qo‘yilishi belgilangandi.

Ammo so‘nggi ma’lumotlarga ko‘ra, hozirda o‘qituvchilarga yana qo‘shimcha muddat berilishi bo‘yicha Vazirlar Mahkamasiga taklif kiritilgan. Ya’ni, ingliz tili o‘qituvchilari 3 yil davomida ham zarur sertifikatga ega bo‘lmagan bo‘lsa, bu safar ham imkon berilishi mumkin.

Maktab va maktabgacha ta’lim vazirligi boshqarma boshlig‘i Erkin Murodov “Daryo” muxbiri bilan bo‘lgan suhbatda ham bu talab yengillashtirilishi haqida aytib o‘tgan.

Demak, ayni vaqtda vazirlik hukumatga ushbu talabni yengillashtirish bo‘yicha taklif kiritgan. Lekin hozircha bu bo‘yicha Vazirlar Mahkamasining qarori imzolanmadi.

Hujjat imzolansagina, xorijiy til o‘qituvchilariga qo‘yilgan B2 sertifikati talabi biroz yumshatilishi mumkin.

Shuni ham alohida eslatib o‘tish joizki, agar xorijiy tillar o‘qituvchilarga yana qo‘shimcha muddat berish to‘g‘risida Vazirlar Mahkamasi qarori qabul qilinsa, bu tartib yangi ishga kirayotgan o‘qituvchilarga emas, balki amalda maktablarda ishlab kelayotgan o‘qituvchilarga nisbatan tatbiq qilinadi.