Yangi “ta’lim kuratori” Ilxom Siradjev ilk bor jamoatchilikka ko‘rinish berdi

O‘zbekiston Respublikasi Prezidenti Administratsiyasi rahbarining ta’limni isloh qilish bo‘yicha o‘rinbosari lavozimiga tayinlanganiga 10 kun bo‘lgan Ilxom Siradjev ilk bor jamoatchilikka ko‘rinish berdi.

U prezidentning yoshlar bilan muloqot chog‘ida berilgan topshiriq ijrosi doirasida, ya’ni har payshanbada vazirlik va tashkilotlar rahbarlarining ta’lim muassasalarida yoshlar bilan uchrashuv o‘tkazishi to‘g‘risidagi berilgan topshiriq asosida Termiz davlat pedagogika institutida bo‘lib, talaba va tyutorlar bilan uchrashdi.

Unga Maktabgacha va maktab ta’limi vaziri E’zoza Karimova, uning o‘rinbosari Sherzod Karimov hamda boshqa bir qancha mas’ullar hamrohlik qilgan.

Unda bitiruvchi talabalarni ish bilan ta’minlash, yoshlar orasida huquqbuzarlik holatlarining oldini olish va ularning vaqtini mazmunli tashkil etish yuzasidan muhim vazifalar belgilab berilgan.

Uchrashuvda bildirilgan taklif va mulohazalarni atroflicha o‘rganish va zarur choralar ko‘rish bo‘yicha mas’ullarga tegishli ko‘rsatmalar berdi.

Eslatib o‘tamiz, joriy yilning 16-fevral kuni O‘zbekiston Respublikasi Prezidentining tegishli farmonlari bilan Hilola Umarova boshqa ishga o‘tishi munosabati bilan O‘zbekiston Respublikasi Prezidenti Administratsiyasi rahbarining ta’limni isloh qilish bo‘yicha o‘rinbosari lavozimidan ozod etildi.

Uning  o‘rniga esa Ilxom Siradjev Toxirovich O‘zbekiston Respublikasi Prezidenti Administratsiyasi rahbarining ta’limni isloh qilish bo‘yicha o‘rinbosari lavozimiga tayinlandi.

5 oy avval u O‘zbekiston Respublikasi Prezidenti Administratsiyasi rahbari Saida Mirziyoyevaning farmoyishi bilan Prezident Administratsiyasi rahbarining ta’limni isloh qilish bo‘yicha o‘rinbosari bo‘linmasi loyiha koordinatori lavozimiga ishga o‘tgandi.

Ilxom Siradjev uzoq yillar davomida Maktabgacha va maktab ta’limi vazirligining Moliya-iqtisod departamenti direktori lavozimida ham ishlagan.