Nogironligi bo‘lgan pedagoglarga attestatsiya va milliy sertifikat imtihonlarida qo‘shimcha vaqt beriladi

Avvalroq O‘zbekiston Respublikasi Prezidentining 2026-yil 4-avgustdagi PQ-292-son qarori imzolangani hamda mazkur hujjat bilan alohida ta’lim ehtiyojlari bo‘lgan bolalarga ta’lim xizmatlarini ko‘rsatish tizimini takomillashtirish bo‘yicha chora-tadbirlar dasturi belgilanganligi haqida xabar bergandik.

Qarorda alohida ta’lim ehtiyojlari bo‘lgan bolalar uchun ta’lim olish imkoniyatlarini kengaytirish, ularning ta’lim jarayonida teng sharoitlarda ishtirok etishini ta’minlash hamda inklyuziv ta’limni rivojlantirishga qaratilgan bir qator vazifalar belgilangan. Mazkur yo‘nalishdagi muhim yangiliklardan biri nogironligi bo‘lgan abituriyentlar va pedagoglar uchun imtihon jarayonlarida qo‘shimcha imkoniyatlar yaratilishidir.

Unga ko‘ra, 2027/2028-o‘quv yilidan boshlab nogironligi bo‘lgan pedagoglarga attestatsiya va milliy sertifikat imtihonlarini topshirishda belgilangan vaqt me’yorining 50 foizi miqdorida qo‘shimcha vaqt olish imkoniyati beriladi.

Bundan tashqari, qaror bilan imtihon materiallarini nogironligi bo‘lgan shaxslarning ehtiyojlariga mos shakllarda taqdim etish ham nazarda tutilmoqda. Xususan, imtihon materiallari Brayl alifbosida, audio va elektron formatlarda taqdim etiladi.

Mazkur tartib nogironligi bo‘lgan abituriyentlarga tatbiq etiladi. Ya'ni, ular ham oliy ta’lim muassasalariga kirish imtihonlarida belgilangan vaqt me’yorining 50 foizi miqdorida qo‘shimcha vaqtga ega bo‘ladi.