Bog‘cha tarbiyalanuvchi hasharotlarga qarshi dori ichib qo‘yishi oqibatida vafot etdi

Ohangaron shahridagi 6-sonli davlat maktabgacha ta’lim tashkiloti tarbiyalanuvchisi hasharotlarga qarshi dorini ichib qo‘yishi oqibatida vafot etdi. Holat bo‘yicha Toshkent viloyati Maktabgacha va maktab ta’limi boshqarmasi holat yuzasidan rasmiy munosabat bildirdi.

Ma’lum bo‘lishicha, 2023-yilda tug‘ilgan tarbiyalanuvchi bog‘cha oshxonasida hasharotlarga qarshi kurashishda foydalaniladigan BSM vositasini ichib qo‘ygan. Bola zudlik bilan Ohangaron shahar tibbiyot birlashmasiga olib borilgan bo‘lsa-da, shifokorlarning ko‘rsatgan yordamiga qaramay, uning hayotini saqlab qolishning imkoni bo‘lmagan.

Dastlabki ma’lumotlarga ko‘ra, bolaning buvisi mazkur maktabgacha ta’lim tashkiloti oshxonasida autsorsing tashkiloti xodimi sifatida oshpaz bo‘lib ishlagan. Hodisa bola buvisining yoniga, oshxonaga kirgan vaqtda yuz bergani aytilmoqda.

Ayni paytda mazkur ma’lumotlar asosida hodisaning barcha tafsilotlari vakolatli organlar tomonidan o‘rganilmoqda. Xususan, tarbiyalanuvchining oshxonaga qanday kirgani, hasharotlarga qarshi vosita nima sababdan bola bemalol qo‘li yetadigan joyda bo‘lgani, mazkur vositani saqlash va undan foydalanish uchun kim mas’ul ekani kabi masalalarga aniqlik kiritilmoqda.

“Bola hayotiga zomin bo‘lgan hodisaning biror jihati e’tibordan chetda qolmaydi. Tergov ishlari davom etmoqda, aybdorligi aniqlangan shaxslarga nisbatan qonun doirasida chora ko‘riladi.”, - deyiladi rasmiy bayonotda.

Eslatib o‘tamiz, avvalroq Namangan viloyatidagi davlat bog‘chalarining birida ishlovchi ombor mudiri 5 yoshli tarbiyalanuvchi bilan bog‘liq jinsiy zo‘ravonlik holati yuzasidan jinoiy ish qo‘zg‘atilgandi.