“Zamhokim” Buxoro viloyati MMTBga boshliq bo‘ldi

O‘zbekiston Respublikasi Maktabgacha va maktab ta’limi vazirining lavozimga tayinlash to‘g‘risidagi tegishli buyrug‘iga ko‘ra, Elliyev Hamza Quvvatovich Buxoro viloyati maktabgacha va maktab ta’limi boshqarmasi boshlig‘i lavozimiga tayinlandi.

Mazkur lavozimga tayinlangunga qadar u Qorako‘l tumani hokimining yoshlar siyosati, ijtimoiy rivojlantirish va ma’naviy-ma’rifiy ishlari bo‘yicha o‘rinbosari lavozimida ishlab kelayotgandi.

Hamza Elliyev 1988-yilda Samarqand viloyati Paxtachi tumanida tug‘ilgan. 2010-yilda Buxoro davlat universitetini tamomlagan. Ma’lumoti bo‘yicha mutaxassisligi — fizika fani o‘qituvchisi.

Hamza Elliyev 2013-yilda fizika fani bo‘yicha magistrlik darajasini ham olgan. U 2010-2018-yillarda Buxoro shahar Tibbiyot kollejida o‘qituvchilikdan bo‘lim boshlig‘igacha bo‘lgan lavozimlarda faoliyat yuritgan.

Hamza Elliyev Buxoro shahridagi 27-imkoniyati cheklangan bolalarga ixtisoslashtirilgan maktab-internat direktori o‘rinbosari hamda Qorako‘l tumani Maktabgacha va maktab ta’limi bo‘limi boshlig‘i lavozimlarida ham faoliyat olib borgan.

Shu kunga qadar Buxoro viloyati maktabgacha va maktab ta’limi boshqarmasi boshlig‘i lavozimida ishlab kelayotgan Qurbonov Farrux Ergashevich qaysi lavozimga o‘tkazilgani haqida ma’lumot berilmagan.