O‘qituvchiga moddiy yordam yiliga necha marta berilishi mumkin?

Savol

Bir yil davomida o‘qituvchilarga necha martagacha moddiy yordam puli bersa bo‘ladi? Masalan, o‘qituvchining o‘zi ham , uning yaqin qarindoshi ham og‘ir kasallikka chalinsa, pedagogga bir necha marta moddiy yordam puli bersa bo‘ladimi?

Javob

Vazirlar Mahkamasining 2019-yil 30-sentyabrdagi 823-son qarori bilan tasdiqlangan nizomning 33-bandiga ko‘ra umumta’lim muassasalari xodimlariga moddiy yordam xodimning o‘zi yoki yaqin qarindoshi (otasi, onasi, turmush o‘rtog‘i, farzandi) vafot etganda, og‘ir kasallikka chalinganda, xodim tabiiy ofatdan zarar ko‘rganda ko‘rsatiladi.

Bunda kalendar yili davomida bir xodimga to‘lanadigan moddiy yordamlarning jami miqdori uning lavozim maoshi (o‘qituvchining tarif stavkasi) miqdorining ikki barobaridan oshirilishiga yo‘l qo‘yilmaydi.

Bu shuni anglatadiki, pedagog xodimga kalendar yili davomida beriladigan moddiy yordam berishlar soni cheklanmagan, ammo moddiy yordam puli miqdori cheklangan.

Aytaylik, pedagog xodim kalendar yili davomida og‘ir kasallikka chalindi va unga lavozim maoshi miqdorining bir barobari miqdorida moddiy yordam puli berildi.

Oradan hech qancha vaqt o‘tmay, aynan o‘sha xodimning yaqin qarindoshlaridan biri og‘ir kasallikka chalindi. Bu holatda xodimga yana bir marta lavozim maoshi miqdorining bir barobari miqdorida moddiy yordam berilishi mumkin.

Shu bilan pedagog xodimga kalendar yili davomida beriladigan moddiy yordam puli limiti tugaydi. Aksincha, pedagog xodimga og‘ir kasallikka chalingan vaqtida birdaniga ikki lavozim maoshi miqdorida moddiy yordam puli berilsa, u kalandar yili davomida boshqa moddiy yordam puli ololmaydi.

Xulosa o‘rnida aytadigan bo‘lsak, pedagog xodim kalendar yili davomida ikki lavozim maoshi miqdorigacha moddiy yordam puli olishga haqli. Bu summani moddiy yordam puli sifatida ikki yoki uchga bo‘lib olishi ham mumkin. Muhimi, moddiy yordam puli uning lavozim maoshi (o‘qituvchining tarif stavkasi) miqdorining ikki barobaridan oshmasa bo‘lgani.