O‘qituvchining turmush o‘rtog‘i og‘ir kasal bo‘lsa, unga moddiy yordam beriladimi?

09:00 / 29.04.2024 1.70k

Savol

Men maktabda ishlayman, turmush o‘rtog‘im operatsiya bo‘lgani uchun moddiy yordam olsam bo‘ladimi? Moddiy yordam so‘rasam, sizga berilmaydi, chunki turmush o‘rtog‘ingiz operatsiya bo‘lgan. Moddiy yordam o‘qituvchining o‘zi operatsiya bo‘lsagina beriladi, chunki turmush o‘rtog‘ingiz maktabda ishlamaydi, deyishyapti. Shu to‘g‘rimi?

Javob

Vazirlar Mahkamasining 823-sonli qarori bilan tasdiqlangan nizomning 12-B-bandiga ko'ra umumta’lim muassasalari xodimlariga ularning murojaatlari yoki kasaba uyushmasi qo‘mitasining tashabbusiga ko‘ra moddiy yordam belgilanishi mumkin.

Nizomning 33-bandiga ko‘ra umumtaʼlim muassasalari xodimlariga moddiy yordam kalendar yil davomida ikki lavozim maoshi (o‘qituvchining tarif stavkasi) miqdorigacha xodimning o‘zi va yaqin qarindoshi (otasi, onasi, turmush o‘rtog‘i, farzandi) vafot etganda, og‘ir kasallikka chalinganda, xodim tabiiy ofatdan zarar ko‘rganda ko‘rsatiladi.

Yaʼni, agar turmush o‘rtog‘ingiz og‘ir kasallik tufayli operatsiya qilingan bo‘lsa, sizga moddiy yordam berilishi kerak deb hisoblaymiz. Bu masala yuzasidan kasaba uyushmasiga yozma murojaat qilishni tavsiya qilamiz.