Endi o‘quvchilar har yili chuqurlashtirilgan tibbiy ko‘rikdan o‘tkaziladi

Endilikda umumiy o‘rta ta’lim maktablarida o‘quvchilarni tibbiy ko‘riklardan o‘tkazish jarayonida ularning fiziologiya va antropometriya holatiga baho berish orqali sport turiga bo‘lgan qobiliyatini aniqlash va shu asosda ularni sportga yo‘naltirish bo‘yicha elektron tizim yo‘lga qo‘yiladi.

Bu haqda Vazirlar Mahkamasining “O‘quvchilarning fiziologiya va antropometriya holatiga baho berish orqali ularni sport turlariga yo‘naltirish hamda sportni ommalashtirish chora-tadbirlari to‘g‘risida”gi qarori qabul qilindi.

Qarorga ko‘ra:

2025-yil 15-avgustga qadar:

• o‘quvchilarning fiziologik va antropometrik ko‘rsatkichlaridan kelib chiqqan holda, ularni sport turlariga yo‘naltirish bo‘yicha ma’lumotlarni o‘z ichiga olgan maxsus modul ishga tushiriladi;

• o‘quvchilar har yili bir marta har bir hududdagi ko‘p tarmoqli markaziy poliklinikada chuqurlashtirilgan tibbiy ko‘rikdan o‘tkaziladi;

2025-2026-o‘quv yilidan boshlab:

• har yili bir marta maktab hamshiralari uchun o‘quvchilarning fiziologik va antropometrik ko‘rsatkichlarini aniqlash bo‘yicha o‘quv-seminarlar tashkil etiladi;

• har bir maktabda yakkakurash va jamoaviy olimpiya sport turlari bo‘yicha kamida 1 tadan to‘garak tashkil qilish maqsadida sport maktabidagi murabbiylarni maktablarning jismoniy tarbiya fani o‘qituvchilariga biriktiriladi;

2025-yil 15-sentyabrga qadar:

• tegishli platforma ma’lumotlariga ko‘ra sport turlari bo‘yicha eng yaxshi ko‘rsatkichga ega bo‘lgan o‘quvchilar sport maktablariga yo‘naltiriladi.