Attestatsiya to‘lovi 10-martgacha amalga oshiriladi, biroq xatolik chiqsa, pullar qaytarilmaydi

Maktabgacha va maktab ta’limi vazirligi attestatsiya uchun to‘lovlarni amalga oshirishni 2026-yilning 10-martiga qadar uzaytirdi.

Ma’lumki, 2026-yilning birinchi yarmida o‘tkaziladigan pedagog kadrlar attestatsiyasi uchun murojaat yuborish 1-martga qadar davom etdi.

Vazirlikning ma’lum qilishicha, navbatdan tashqari (o‘z ixtiyori bilan) attestatsiyada ishtirok etish uchun ariza yuborgan pedagoglar tomonidan to‘lov qilishga ulgurmay qolish holatlari bo‘lgan va bu bo‘yicha Maktabgacha va maktab ta’limi vazirligiga murojaat qilishgan.

Shu sababli, vazirlik o‘qituvchilarni har tomonlama qo‘llab-quvvatlash hamda ularga qulaylik yaratish maqsadida pedagoglar attestatsiyasida ishtirok etish uchun to‘lovni amalga oshirish muddatini joriy yilning 10-martiga qadar uzaytirgan.

To‘lov qilish mumkin, ammo arizada xatolik chiqsa, pullar qaytarilmaydi

Maktabgacha va maktab ta’limi vazirligi garchi to‘lov qilish muddatini 10-martgacha uzaytirgan bo‘lsa-da, ammo xatolik qayd etilgan arizalarni qayta tahrirlashga ruxsat bermaydi.

Chunki, arizalarni qabul qilish 1-mart kuni to‘xtatilgan. Lekin 10-martgacha to‘lov qilgan pedagoglarning hujjatlarini to‘liq ko‘rib chiqiladi. Ammo, pedagoglar yuborgan arizada xatolik chiqib, hujjatlar rad etilsa, o‘qituvchi uni qayta tahrirlay olmaydi hamda attestatsiya uchun amalga oshirgan to‘lovlari ularga qaytarilmaydi.

Chunki, Vazirlar Mahkamasining 2021-yil 17-sentabrdagi 572-son qarori bilan tasdiqlangan “Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida”gi nizom talablariga muvofiq pedagog kadrlardan hujjatlarni qabul qilish har yili 1-mart va 1-oktyabr sanalarida to‘xtatilishi belgilangan.