Anomal issiq sababli yopilgan bog‘cha xodimlarining ish haqi toʻliq toʻlab beriladi, ota-onalardan ham to‘lov undirilmaydi

Anomal issiq kuzatilayotgan kunlarda bolalarning salomatligi va xavfsizligini ta’minlash maqsadida ayrim hududlarda davlat maktabgacha ta’lim tashkilotlari faoliyati vaqtinchalik to‘xtatilgandi.

Keyinroq Advokat Saydali Muxtoraliyev Maktabgacha va maktab ta’limi vazirligi vaqtinchalik yopilgan davlat maktabgacha ta’lim tashkilotlari xodimlariga ish haqi qaysi tartibda to‘lanishiga aniqlik kiritishi kerakligini aytgandi.

Ma’lum bo‘lishicha, bekor turib qolingan vaqtga mutanosib ravishda bog‘cha xodimlarga ish haqini toʻliq toʻlash bo‘yicha ko‘rstma berilgan. Ko‘rsatmada ta'kidlanishicha, Mehnat kodeksi 266-moddasiga asosan ish beruvchiga va xodimga bogʻliq boʻlmagan sabablarga koʻra bekor turib qolingan vaqt uchun bekor turib qolingan vaqtga mutanosib ravishda hisoblangan tarif stavkasining (maoshining) kamida uchdan ikki qismi miqdorida haq toʻlanishi koʻrsatib oʻtilgan.

Shu sababli, vazirlik Qoraqalpogʻiston Respublikasi Maktabgacha va maktab taʼlimi vazirligi, Toshkent shahar hamda viloyatlar maktabgacha va maktab taʼlimi boshqarmalariga bekor turib qolingan vaqtga mutanosib ravishda bog‘'cha xodimlariga ish haqini toʻliq toʻlab berish bo‘yicha ko‘rsatma bergan.


Shuningdek vazirlik bolalarning bogʻchaga kelmagan kunlari uchun ota-onalardan toʻlov undirilmasligi bo‘yicha ham ko‘rsatma berdi.

Ta’kidlanishicha, Adliya vazirligida 2016-yil 23-avgustda 2821-son bilan roʻyxatdan oʻtkazilgan buyruq bilan tasdiqlangan “Maktabgacha taʼlim tashkilotlari va maktab internatlardagi bolalar taʼminotiga haq toʻlash tartibi toʻgʻrisida”gi Nizomning 13-bandiga muvofiq ota-onalardan birining sababi koʻrsatilgan holda maktabgacha taʼlim tashkiloti direktori nomiga oldindan yozgan arizasiga asosan bola yoki uning oila aʼzolari kasal yoki karantin holatida boʻlganida, shuningdek ota-onalardan birining ishdan (oʻqishdan) boʻsh vaqtida misol uchun, mehnat taʼtiliga chiqqanida ketma-ket uch kundan ortiq bogʻchaga kelmagan davri uchun ota-onalar toʻlovi undirilmasligi belgilangan.

Shu bilan birga, bolalarning elektron davomat maʼlumotlari ota-onalar toʻlovlarini hamda qonunchilikda belgilangan boshqa hisob-kitoblarni amalga oshirish uchun yagona asos hisoblanadi.

Shunga ko‘ra, bolaning bogʻchaga kelmagan kunlari uchun ota-onalar toʻlovi undirilmaydi. Agar ota-ona toʻlovi amalga oshirilgan boʻlsa, bola kelmagan kunlar uchun toʻlov miqdorini keyingi oydagi toʻlov summasidan kamaytirilgan holda undiriladi.

Demak, anomal issiq sababli faoliyati vaqtincha to‘xtatilgan davlat maktabgacha ta’lim tashkilotlari xodimlarining ish haqi to‘liq saqlab qolinadi. Shuningdek, bolalar bog‘chaga kelmagan kunlar uchun ota-onalardan to‘lov undirilmaydi, avvaldan to‘langan mablag‘ esa keyingi oy hisobiga o‘tkaziladi. Shu tariqa, vazirlik anomal issiq ob-havo sharoitida xodimlarning mehnat huquqlari va ota-onalarning manfaatlarini himoya qilishga qaratilgan ko‘rsatmani berdi.