7 695 ta maktab uchun maktab maslahatchilari saralab olindi

2026-yil yanvar oyida 3 400 ta maktab uchun maktab maslahatchisi lavozimiga tanlov jarayonlari o‘tkazilib, saralash bosqichidan muvaffaqiyatli o‘tgan nomzodlar maslahatchi sifatida ish faoliyatini boshlagandi. Joriy yilning 22-aprel sanasidan boshlab esa qolgan 7 695 ta maktablardagi vakant maslahatchi lavozimi uchun tanlovga start berilgandi.

Shuningdek, Maktabgacha va maktab ta’limi vazirligining 2026-yil 8-yanvardagi 7-sonli buyrug‘iga ko‘ra maktab maslahatchisi lavozimiga oliy, bakalavr diplomiga ega bo‘lgan nomzodlar qabul qilinishi belgilangan bo‘lsa-da, Respublika “Kelajak” markazi oliy ta’lim tashkilotlarining 4-bosqich (kunduzgi) hamda sirtqi ta’lim shaklida tahsil olayotgan 5-bosqich talabalariga ham maktab maslahatchisi lavozimi uchun nomzod sifatida ariza yuborishga rozilik bergandi.

Respublika “Kelajak” markazining xabar berishicha, 6-18-iyul kunlari maktab maslahatchisi lavozimi uchun o‘tkazilayotgan tanlovning ikkinchi mavsumi — suhbat bosqichi bo‘lib o‘tdi. Unda 7 695 ta umumta’lim maktabi uchun maslahatchilarni saralash jarayonlari o‘tkazilgan.

Maktab maslahatchisi lavozimi uchun o‘tkazilayotgan tanlovning yakuniy natijalari bugun, 23-iyuldan boshlab tanlov.uzedu.uz platformasi orqali nomzodlarning shaxsiy kabinetiga yuboriladi.

Endilikda tanlov komissiyasining maxsus tavsiyanomasini olgan talabgorlar maktab maslahatchisi sifatida ish boshlaydi.

Ma’lumot uchun: tanlovning ikkinchi mavsumiga jami 42 932 ta ariza kelib tushgan. Belgilangan talablarga javob bergan 38 303 nafar talabgor testda ishtirok etgan. Test sinovlarida yuqori natija ko‘rsatgan 19 294 nafar nomzod suhbat bosqichiga tavsiya etilgan.

Eslatib o‘tamiz, 2025-yil 9-sentyabrda Prezident Shavkat Mirziyoyev raisligida maktabgacha va maktab ta’limi sohasidagi islohotlar ijrosi va kelgusidagi ustuvor vazifalar yuzasidan o‘tkazilgan videoselektor yig‘ilishida har bir maktabda maslahatchi lavozimi joriy qilinishi tashabbusi ilgari surilgandi.

Keyinroq, O‘zbekiston Respublikasi Prezidentining “Maktabdan tashqari ta’lim tizimini yangi bosqichga olib chiqish chora-tadbirlari to‘g‘risida”gi qarori (PQ–277-son, 08.09.2025 y.) bilan 2025-yil 1-oktyabrdan boshlab maktabgacha va maktab ta’limi tizimidagi umumiy o‘rta ta’lim tashkilotlaridagi ma’naviy-ma’rifiy ishlar bo‘yicha direktor o‘rinbosari lavozimini har bir umumiy o‘rta ta’lim tashkilotiga 1 ta shtat birligida ajratish hisobiga bo‘shaydigan 3 400 ta shtat birliklari hisobiga “Kelajak” markazlarining umumiy o‘rta ta’lim tashkilotlarida vertikal tizimini joriy etish maqsadida o‘quvchilar tashabbuslarini qo‘llab-quvvatlash bo‘yicha maktab maslahatchisi lavozimini joriy qilinishi belgilandi.