1-, 5- va 7-sinf o‘quvchilari avtohalokat tufayli halok bo'ldi

09:50 / 24.04.2024 1.33k

Joriy yilning 15-aprel kuni Jizzax viloyati G‘allaorol tumanidagi “Oqtom” mahallasi hududidan yuqori tezlikda harakatlanib, rul boshqaruvini yo‘qotgan Gentra avtomobili haydovchisi qarama-qarshi yo‘nalishda maktab tomon harakatlanib ketayotgan 5- va 7-sinf o‘quvchilarini urib yuborgan.

Avtohalokat oqibatida bolalar vafot etgan. Mazkur holat yuzasidan O‘zbekiston Respublikasi Jinoyat kodeksining 266-moddasi 3-qismi bilan jinoyat ishi qo‘zg‘atilib, haydovchiga nisbatan O‘zbekiston Respublikasi Jinoyat-protsessual kodeksining 221-moddasi tartibida qamoq ehtiyot chorasi qo‘llanilgan.

“100 tezlikda kelayotgandim. Boshqaruvni yo‘qotdim. Asfalt yo‘lida yomg‘ir edi. Mashinamning orqasi o‘ynab ketdi. Qo‘rqqanimdan rulni to‘g‘rilay olmadim. Bolalarni urib yubordim”, deydi haydovchi.

Shuningdek, 19-aprel kuni Qashqadaryo viloyati Shahrisabz tumanida maktabdan qaytayotib piyodalar yo‘lakchasidan o‘tayotgan 1-sinf o‘quvchisini katta tezlikda harakatlanib kelgan “Damas” mashinasi urib yuborishi oqibatida o‘quvchi halok bo‘ldi.

Ma’lum bo‘lishicha, Shahrisabz shahridagi 11-maktabning 1-“B” sinf o‘quvchisi O. I. 2024-yil 19-aprel kuni maktabga kelgan hamda darslarga to‘liq qatnashgan. Soat 12:35 larda o‘quvchi uyi yonidagi piyodalar yo‘lakchasidan o‘tayotganda yuqori tezlikda kelayotgan “Damas” mashinasi urib yuborgan.

O‘quvchi zudlik bilan Shahrisabz shahar shoshilinch tez tibbiy yordam bo‘limiga olib borilgan. Ko‘rsatilgan tez tibbiy yordamlarga qaramasdan u vafot etgan.

Qayd etilishicha, haydovchiga nisbatan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Haydovchi protsessual tarzda qamoqqa olingan.