Maktablarga harbiy poligonlardan foydalanishga ruxsat berildi

“O‘q otish sport turlarini yanada rivojlantirish va ommalashtirish chora-tadbirlari to‘g‘risida”gi Prezident qarori (PQ-381-son, 04.11.2024) imzolandi.

Qarorga ko‘ra, 2025/2026-o‘quv yilidan boshlab umumiy o‘rta ta’lim muassasalarida chaqiruvga qadar boshlang‘ich tayyorgarlik fani o‘quv dasturlari doirasida “O‘qotar va pnevmatik sport qurollarining taktik-texnik tavsiflari” amaliy mashg‘ulotlari kiritilishi belgilandi. Ya’ni, endilikda maktab o‘quvchilari qurol otish bo‘yicha amaliy mashg‘ulot o‘taydilar.

Bunda o‘qotar va pnevmatik sport qurollarining taktik-texnik tavsiflari bo‘yicha amaliy mashg‘ulotlarni tashkil etishda umumiy o‘rta ta’lim muassasalariga o‘zlariga biriktirilgan harbiy qism, muassasalar, harbiy poligonlarning doimiy joylashuv joyidagi o‘quv-moddiy bazasidan beg‘araz asosda foydalanishlariga ruxsat etiladi.

Eslatib o‘tamiz, avvalroq Prezident Shavkat Mirziyoyev maktablarda musiqa, jismoniy tarbiya va harbiy vatanparvarlik fanlari sifatini oshirish bo‘yicha taqdimot bilan bilan tanishish chog‘ida chaqiriqqacha boshlang‘ich tayyorgarlik o‘qituvchisi shtati Mudofaa vazirligiga o‘tkazilishi, endi bu vazifaga Qurolli Kuchlar zaxirasidagi harbiylar ishga qabul qilinishini aytgandi.