O‘qituvchilar maosh kamligi uchun maktabga bormayapti

11:30 / 10.05.2024 10.78k

Bugungi kunda oliygohni tamomlayotgan, yaxshi bilimga ega xorijiy til o‘qituvchilari oylik maosh kamligi uchun maktabda ishlashni xohlamayapti. Bu haqda Ta’lim muassasalari faoliyatini tashkil etish, litsenziyalash, ta’lim sifatini ta’minlash departamenti boshlig‘i Abduvali Xoliqov 8-may kuni bo‘lib o‘tgan matbuot anjumanida ma’lum qildi.

Qalampir.uz sayti jurnalisti matbuot anjumanida xorijiy til bo‘yicha oliygohni tamomlagan bitiruvchilardan diplomi bo‘lishiga qaramay til sertifikati talab qilinayotgani, til sertifikatiga ega bo‘lmagan bitiruvchilar ishga qabul qilinmayotganiga Oliy ta’lim vazirligining munosabati haqida savol bergan edi.

Bunga Ta’lim muassasalari faoliyatini tashkil etish, litsenziyalash, ta’lim sifatini ta’minlash departamenti boshlig‘i Abduvali Xoliqov quyidagicha javob berdi.

“Xorijiy til o‘qituvchilaridan C1 darajali til sertifikatini talab qilish Oliy ta’lim muassasalarida ham bor, maktablarda ham bor. Yaxshi xorijiy til o‘qituvchilari maktabga ishga bormayapti oyligi kamligidan, ochig‘ini aytadigan bo‘lsak.

Demak, maktab ishga olmasa undan yaxshi joyga ishga borishi kerak. Albatta, ish beruvchining talabi ham inobatga olinishi kerak. Diplom bor, diplom o‘tadi.

Diplom tan olinmaydi, degani emas, noto‘g‘ri talqin qilinmasin. Sertifikat talab qilyapti, sertifikati bo‘lsin o‘qituvchining, degan ma’noda. Faqat, ish beruvchi talab qilayotgan bo‘lsa, sertifikat olish kerak. Xorijiy til o‘qituvchisi xorijiy tilni hammadan yaxshi bilishi kerak”, deydi Xoliqov.