Maktab maslahatchisi o‘quvchi qizga shilqimlik qilgani uchun besh sutkaga qamaldi

Sirdaryoda 16 yoshli o‘quvchi qizga nisbatan maktab maslahatchisi tomonidan shahvoniy mazmundagi xabarlar yuborilgani bilan bog‘liq holat jinoyat ishlari bo‘yicha sudda ko‘rib chiqildi. Bu haqda “Bukun” information dasturida xabar berilgan. 

Ma’lum bo‘lishicha, maktab maslahatchisi 16 yoshli o‘quvchiga go‘yoki maktabning ijtimoiy tarmoqdagi sahifasini yuritishni bahona qilib, tungi vaqtda ishqiy mazmundagi xabarlar yozgan. Biroq, sud majlisida u o‘z qilmishini tan olmagan va taqdim etilgan dalillarni ham inkor etishga uringan. 

“O‘quvchi bilan hech qanaqa munosabatim bo‘lmagan. O‘quvchiga sevgi izhor qilgan ekansiz, deyishyapti. To‘g‘risi, bu yerda anglashilmovchilik bo‘lyapti. Men hech qachon hech qanaqa qiz bilan sevishmaganman. Mening o‘zimning, uch nafar farzandim bor” — degan huquqbuzar. 

Sudda o‘quvchi qizning onasi uning qonuniy vakili sifatida ishtirok etib, ta’lim va tarbiya dargohida bunday xodimlarga o‘rin bo‘lmasligini aytgan va pedagogga nisbatan qonuniy chora ko‘rilishini so‘ragan. Tegishli dalillar va guvohlarning ko‘rsatmalari ostida qilgan ishi huquqbuzarlik ekanligini kech bo‘lsa-da tushunib yetgan maktab maslahatchisi sud majlisida o‘quvchi qiz hamda uning oila a’zolaridan kechirim so‘ragan. 

Aniqlanishicha, maktab maslahatchisi 10-sinf o‘quvchisiga nisbatan tungi soat 1:00 larda Telegram messenjeri orqali SMSlar yuborgan, jabrlanuvchi javob bermagach, unga qo‘ng‘iroq qilib, ko‘chaga chiqishni taklif qilgan va u bilan uchrashish istagini bildirib, shahvoniy tusdagi huquqbuzarlikni sodir etgan. 

Sud unga nisbatan Ma’muriy javobgarlik to‘g‘risidagi kodeksning 41-prim-1 moddasining birinchi qismi bilan besh sutka ma’muriy qamoq jazosi tayinladi. Bundan tashqari, sud mazkur holat yuzasidan o‘qituvchiga nisbatan Sirdaryo viloyati Maktabgacha va maktab ta’limi boshqarmasiga taqdimnoma chiqarish yo‘li bilan munosabat bildirishni lozim topgan.