Prezident qarori bilan tashkil etilgan Psixologiya ilmiy-tadqiqot institutiga rahbar tayinlandi

O‘zbekiston Respublikasi Prezidentining 2026-yil 19-oktabrdagi PQ–379-son qarori bilan Nizomiy Ganjaviy nomidagi O‘zbekiston milliy pedagogika universitetining Psixologiya o‘quv-ilmiy markazi negizida Psixologiya ilmiy-tadqiqot instituti tashkil etilgandi.

Ta’lim va ilm-fan vazirining tegishli buyrug‘i bilan Muxtorova Aziza Erkinovna - Ta’lim va ilm-fan vazirligi huzuridagi Psixologiya ilmiy-tadqiqot instituti direktori lavozimiga tayinlandi. Tayinlovga qadar u faoliyati tugatilgan Psixologiya o‘quv-ilmiy markazi rahbari lavozimida ishlab kelayotgandi.

Aziza Muxtorova 1983-yilda Toshkent shahrida tug‘ilgan. 2004-yilda Toshkent davlat iqtisodiyot universitetining bakalavriat, 2006-yilda esa magistratura bosqichini xalqaro iqtisodiy munosabatlar yo‘nalishi bo‘yicha tamomlagan. 2018-yilda Nizomiy nomidagi Toshkent davlat pedagogika universitetida ikkinchi mutaxassislik bo‘yicha tahsil olib, psixolog mutaxassisligini egallagan.

2023-yilda “Pedagog-psixologlarni kasbiy faoliyatga tayyorlashning psixologik xususiyatlari” mavzusidagi dissertatsiyasini muvaffaqiyatli himoya qilib, psixologiya fanlari bo‘yicha falsafa doktori (PhD) ilmiy darajasini olgan.

Mehnat faoliyatini 2018-yilda Nizomiy nomidagi Toshkent davlat pedagogika universiteti huzuridagi Psixologiya o‘quv-ilmiy markazida psixolog mutaxassisi sifatida boshlagan. Keyinchalik Psixofiziologiya laboratoriyasida yetakchi va bosh ilmiy xodim lavozimlarida faoliyat yuritgan.

2023-yildan Psixologiya o‘quv-ilmiy markazining Psixologik xizmat va targ‘ibot bo‘limi boshlig‘i lavozimida ishlagan. 2024-yilda rektor maslahatchisi, 2025-yildan hozirgi vaqtga qadar esa Psixologiya o‘quv-ilmiy markazi rahbari lavozimida faoliyat yuritgan.

Aziza Muxtorova ilmiy faoliyati davomida pedagogik psixologiya, psixologik xizmat, pedagog-psixologlarni kasbiy tayyorlash hamda bolalarning emotsional-kognitiv rivojlanishi yo‘nalishlarida ilmiy izlanishlar olib borgan. Uning 22 ta ilmiy ishi, jumladan, monografiya, o‘quv va uslubiy qo‘llanmalari, ilmiy maqola hamda tezislari chop etilgan.