Yangi o‘quv yilidan 3-sinflarda ham informatika fani joriy etiladi

Maktabgacha va maktab ta’limi vazirligining umumiy o‘rta ta’lim muassasalari uchun 2025-2026-o‘quv yiliga mo‘ljallangan tayanch o‘quv rejalarni tasdiqlash to‘g‘risidagi buyrug‘i imzolandi.

Mazkur buyruq bilan 2025-2026-o‘quv yilidan boshlab, umumiy o‘rta ta’lim muassasalarining 3-sinfida “Informatika va axborot texnologiyalari” fani joriy etilmoqda.

Bunda A. Avloniy nomidagi pedagogik mahorat milliy instituti 2025-yilning 20-avgust kuniga qadar umumiy o‘rta ta’lim muassasalarining boshlang‘ich sinf o‘qituvchilari uchun “Informatika va axborot texnologiyalari” fanining mazmun-mohiyati bo‘yicha qisqa muddatli onlayn o‘quv kurslarini tashkil etadi.

Hududiy maktabgacha va maktab ta’limi boshqarma boshliqlariga

• umumiy o‘rta ta’lim muassasalarining boshlang‘ich sinflarida “Informatika va axborot texnologiyalari” fani joriy qilinishi munosabati bilan tashkil etiladigan qisqa muddatli o‘quv kurslarda boshlang‘ich sinf o‘qituvchilari ishtirokini ta’minlash;

• 2025-2026-o‘quv yili davomida umumiy o‘rta ta’lim muassasalarida tayanch o‘quv reja va uning tushuntirish xatida belgilangan vazifalarning bajarilishini muvofiqlashtirish;

• umumiy o‘rta ta’lim muassasalarida 2025-2026-o‘quv yiliga mo‘ljallangan tayanch o‘quv rejadan kelib chiqqan holda muassasa xodimlarining ish yuklamalari tarifikatsiyasi va dars jadvallarining ishlab chiqilishi bo‘yicha tushuntirish ishlarini  olib borish;

• 2025-yilning 30-avgust kuniga qadar 2025-2026-o‘quv yiliga mo‘ljallangan tayanch o‘quv rejadagi yangiliklar va tushuntirish xatining mazmun-mohiyatini har bir ta’lim muassasasiga yetkazish hamda pedagogik kengash yig‘ilishlarida targ‘ibot ishlarini tashkil etish vazifalari yuklatildi.

Eslatib o‘tamiz, “Informatika va axborot texnologiyalari” fani 1-2-3-sinflarda “Informatika va axborot texnologiyalari” fani o‘quvchilarning mantiqiy va tizimli fikrlashini rivojlantirishga qaratilganligi sababli mazkur fan boshlang‘ich sinf o‘qituvchilari va 5-11-sinflarda “Informatika va axborot texnologiyalari” fani o‘qituvchilari tomonidan o‘qitiladi. 

Bunda, ushbu fan dars soatlari umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risidagi nizomning (O‘zbekiston Respublikasi Adliya vazirligi tomonidan 2020-yil 30-iyunda ro‘yxatdan o‘tkazilgan, ro‘yxat raqami 3271) 15-bandida belgilangan ko‘rsatkichlar ketma-ketligi asosida taqsimlanadi.