Maktabgacha va maktab ta’limi vazirligining ayrim funksiyalari xususiy sektorga topshirilishi mumkin

Maktabgacha va maktab ta’limi vazirligi tomonidan bajarib kelinayotgan ayrim davlat xizmatlari bosqichma-bosqich xususiy sektorga yo‘naltiriladi.

O‘zbekiston Respublikasi Prezidentining 2025-yil 27-fevraldagi “Xizmatlar sohasi barqaror rivojlanishi uchun qulay shart-sharoitlar yaratishga oid qo‘shimcha chora-tadbirlar to‘g‘risida”gi PQ-78-sonli ijrosini ta’minlash maqsadida Savdo-sanoat palatasi tomonidan so‘rovnoma o‘tkazilmoqda.

Savdo-sanoat palatasi tomonidan e’lon qilingan hujjatga ko‘ra, MMTV tomonidan bajariladigan quyidagi funksiyalar xususiy sektorga topshirilishi mumkin:

• Vazirlik tizimi faoliyatiga daxldor jurnal va gazetalar, blankalar, o‘quv-metodik majmualar, byulletenlar hamda o‘quv qo‘llanmalarini nashr etish, shuningdek, Vazirlikning veb-sayti ishini tashkil qilish;

• “Barkamol avlod” bolalar maktablarida “STEAM — ta’lim” (Science — tabiiy fanlar, Technology — texnologiyalar, Engineering — muhandislik, Art — san’at, Mathematics — matematika) dasturini joriy etish va to‘garaklar mazmuniga singdirishga oid o‘quv dasturlar ishlab chiqish va amaliyotga joriy etish;

• O‘zbekiston “Yoshlik” jismoniy tarbiya va sport jamiyati bilan birgalikda o‘quvchi yoshlar o‘rtasida jismoniy tarbiya va sportni keng targ‘ib qilish, bolalarning muntazam ravishda jismoniy tarbiya bilan shug‘ullanishlari uchun shart-sharoitlar yaratish, “Quvnoq startlar” va “Yozgi ta’til” sport musobaqalarini o‘tkazish, “Umid nihollari” va boshqa sport musobaqalarini o‘tkazish choralarini ko‘rish;

• Rivojlanishida turli nuqsonlari bo‘lgan hamda davolanishga va sog‘lomlashtirishga muhtoj bo‘lgan bolalarning inklyuziv sharoitda ta’lim-tarbiya olishlarini ta’minlash.

Ayni vaqtda xususiy sektorga o‘tkazilishi taklif etilayotgan vazirlik funksiyalari va xizmatlari yuzasidan so‘rovnoma davom etmoqda.