Maktablardagi o‘qituvchilar soni 170 mingga ko‘paydi

Oxirgi 10 yilda umumiy o‘rta ta’lim tashkilotlarida faoliyat yuritayotgan o‘qituvchilar soni 170,9 ming nafarga oshgan. Bu haqda Milliy statistika qo‘mitasi ma’lum qildi.

Ma’lumotlarga ko‘ra, 2024/2025 o‘quv yili boshiga, O‘zbekiston Respublikasida faoliyat yuritayotgan umumiy o‘rta ta’lim tashkilotlarida faoliyat yuritayotgan o‘qituvchilarning (o‘rindoshlarsiz) umumiy soni 564,9 ming nafarni tashkil etgan.

Yillar kesimida umumiy o‘rta ta’lim tashkilotlarida ta’lim berayotgan o‘qituvchilar (o‘rindoshlarsiz) soni:

• 2015/2016-o‘quv yili boshiga - 385 ming nafar;

• 2016/2017-o‘quv yili boshiga - 390,6 ming nafar;

• 2017/2018-o‘quv yili boshiga - 409,4 ming nafar;

• 2018/2019-o‘quv yili boshiga - 444,2 ming nafar;

• 2019/2020-o‘quv yili boshiga - 486,6 ming nafar;

• 2020/2021-o‘quv yili boshiga - 508 ming nafar;

• 2021/2022-o‘quv yili boshiga - 510 ming nafar;

• 2022/2023-o‘quv yili boshiga - 521,6 ming nafar;

• 2023/2024-o‘quv yili boshiga - 547,8 ming nafar;

• 2024/2025-o‘quv yili boshiga - 564,9 ming nafarni tashkil etgan.

So‘nggi statistik ma’lumotlarga ko‘ra, 2024/2025-o‘quv yili boshida umumiy o‘rta ta’lim muassasalarida 6,7 milliondan ortiq o‘quvchi tahsil olmoqda.

Ularga 564,9 ming nafardan ziyod o‘qituvchilar ta’lim bermoqda. Bu shuni anglatadiki, o‘rtacha har bir o‘qituvchiga 12 nafar o‘quvchi to‘g‘ri kelmoqda. (Ushbu hisob-kitobda o‘rindoshlik asosida ishlayotgan o‘qituvchilar soni inobatga olinmagan)

Ma’lumot uchun: 2023/2024-o‘quv yili hisobiga ko‘ra, so‘nggi 5 yilda O‘zbekistonda maktablar soni 6,5 foizga oshib, 10 750 taga yetgan.