“OpenBudget”da 1500 dan ortiq ovoz to‘plagan maktablarga qo‘shimcha mablag‘ ajratiladigan bo‘ldimi?

11:20 / 23.02.2024 2.72k

2023-yilda 1500 ovoz to‘plab, g‘olib bo‘lmagan maktablarning jihozlash bilan bog‘liq loyihalarini moliyalashtirish uchun qo‘shimcha mablag‘ ajratilishi haqida xabar bergandik.

Kuni-kecha Iqtisodiyot va moliya vaziri o‘rinbosari Ahadbek Haydarov huquqshunos, bloger Xushnudbek Xudoyberdiyev bilan bo‘lib o‘tgan suhbatda “OpenBudget”ga aloqador bo‘lgan ko‘plab savollarga ham oydinlik kiritildi.

Avval xabar berganimizdek, “O‘zbekiston Respublikasining Davlat byudjeti to‘g‘risida”gi Qonuniga ko‘ra “Tashabbusli byudjet”da 1500 dan ortiq ovoz to‘plagan, lekin g‘olib deb topilmagan jihozlash bilan bog‘liq loyihalarni moliyalashtirish uchun ta’lim muassasalariga qo‘shimcha mablag‘ ajratilishi ko‘zda tutilgan.

Ya’ni, “OpenBudget”da ishtirok etgan ta’lim muassasalari 1500 dan ortiq ovoz to‘plab, lekin g‘olib deb topilmagan bo‘lsa ham, ushbu ta’lim muassasalari mazkur mablag‘lar hisobidan moliyalashtirib beriladi.

E’tibor bering, Davlat byudjeti to‘g‘risidagi Qonunda faqatgina ta’lim muassasalarini jihozlash bilan bog‘liq loyihalarni moliyalashtirish nazarda tutilgan.

Ya’ni, “OpenBudget”da ta’lim muassasasi qandaydir bino qurish yoki boshqa bir loyihalar bo‘yicha ishtirok etgan bo‘lsa, buning uchun mablag‘ berilmaydi. Takroran aytamiz, ushbu mablag‘lar faqatgina jihozlash bilan bog‘liq bo‘lgan loyihalarni moliyalashtirish uchun yo‘naltiriladi.

Xalqtaliminfo.uz tahririyati tomonidan e’lon qilingan ushbu xabarni ayrimlar bu yolg‘on ma’lumot degan holatlar ham juda ko‘p uchradi. Lekin shuni alohida ta’kidlab o‘tishimiz joizki, xalqtaliminfo.uz tahririyati yolg‘on, asoslanmagan ma’lumotlarni e’lon qilinmaydi.

Sababi ushbu ma’lumotlar aynan Prezident Shavkat Mirziyoyev tomonidan 2023-yil 25-dekabrda imzolangan O‘RQ–886-sonli “O‘zbekiston Respublikasining Davlat byudjeti to‘g‘risida”gi Qonundan olingan edi. (Qonunning 24-25 sahifalari bilan tanishing)

Shuningdek, Iqtisodiyot va moliya vaziri o‘rinbosari Ahadbek Haydarov ham ushbu ma’lumotni rasman tasdiqlab, 2023-yilda 1500 ovoz to‘plab, g‘olib bo‘lmagan ijtimoiy soha tashkilotlarini (bog‘cha, maktab, shifoxona) jihozlash bo‘yicha loyihalar moliyalashtirilishi, buning uchun 2024-yilgi Davlat byudjetida qariyb 200 mlrd so‘m mablag‘ ko‘zda tutilganligini ma’lum qildi.