Aprel oyidan boshlab PIRLS 2026 tadqiqotining tajriba-sinov bosqichi boshlanadi

PIRLS tadqiqoti natijasida boshlang‘ich sinf o‘quvchisining bilimini, o‘qigan matnini qay darajada tushunishi, shundan kelib chiqib fikrlay olishi tahlil qilinadi.

PIRLS tadqiqoti 2001-yildan boshlab har besh yilda bir marta tashkil etilib kelinmoqda. Hozirgacha u besh marta — 2001, 2006, 2011, 2016 va 2021-yillarda o‘tkazilgan. 2026-yilda bo‘lib o‘tadigan navbatdagi bosqichda 61 davlat ishtirok etishi rejalashtirilgan.

PIRLS (Progress in International Reading Literacy Study) xalqaro tadqiqoti Ta’lim yutuqlarini baholash xalqaro assotsiatsiyasi (IEA – International Association for the Evaluation of Educational Achievement) tomonidan tashkil etilgan.

O‘zbekistonda aprel-may oylarida 30 ta maktabda PIRLS 2026 tadqiqotining tajriba-sinov jarayonlari o‘tkazilishi ma’lum qilindi.

Bu haqda joriy yilning 11-aprel kuni Maktabgacha va maktab ta’limi vaziri Hilola Umarova raisligida o‘tkzailgan “Vazir soati”da aytildi.

Mas’ul xodimlarga tanlab olingan 30  ta maktabda PIRLS 2026 tadqiqotini o‘tkazish bo‘yicha barcha sharoitlarni yaratish, har bir maktab o‘quvchilarning soniga nisbatan yana qo‘shimcha 3 ta kompyuter jihozlari bilan ta’minlash bo‘yicha ko‘rsatmalar berildi.

Eslatib o‘tamiz, PIRLS 2021 tadqiqotida O‘zbekiston o‘quvchilari ham ilk bor ishtirok etib, unda 57 ta mamlakat orasida 49-o‘rinni egallagandi. 

Bunda birinchi o‘rinni Singapur, ikkinchi o‘rinni Irlandiya, uchinchi o‘rinni Gonkong mamlakati egallagan. 

Ma’lumot uchun, MDX mamlakatlari ham ushbu nufuzli tadqiqotda ishtirok etib, Rossiya 4-o‘rin, Qozog‘iston 38-o‘rin, Gruziya 41-o‘rin va Ozarbayjon 48-o‘rinlarni egallagan.