Endi har dushanba “Kelajak soati” darslari o‘tiladi

Bugun, 26-avgustdan Maktabgacha va maktab ta’limi vazirligi tomonidan tashkil etilgan “Maktabgacha va maktab ta’limi tizimida  tarbiyaviy ishlar samaradorligini oshirish va istiqboldagi rejalar” mavzusidagi o‘quv seminariga start berildi. 

Unda vazir E’zoza Karimova, vazir o‘rinbosari Farxod Boqiyev, vazirlik mas’ullari hamda ta’lim tizimi xodimlari ishtirok etdi.

Tadbirning ochilish marosimida so‘zga chiqqan vazir E’zoza Karimova ma’naviy-ma’rifiy yo‘nalishdagi bir qancha yangiliklar haqida ma’lumot berdi.

Jumladan, yangi o‘quv yilidan “bog‘cha – maktab – oliy ta’lim” tizimida yagona g‘oyaviy tarbiya tizimi yo‘lga qo‘yilishi ta’kidlandi.

Shuningdek, barcha ta’lim tashkilotlarida haftaning har dushanba kuni “Kelajak soati” darslari tashkil etilib, zarur qo‘llanmalar milliytarbiya.uz platformasi orqali yetkaziladi. 

Ta’lim tashkilotlarida ma’naviy-ma’rifiy ishlar bo‘yicha mas’ul rahbar va pedagoglarni rag‘batlantirish maqsadida har o‘quv yilida “Milliy qadriyatlar targ‘ibotchisi” respublika tanlovi o‘tkaziladi. Tanlov g‘oliblarini munosib rag‘batlantirish yo‘lga qo‘yiladi.