Vazir ustamasi puli “otpusknoy”ga qo‘shiladimi?

Savol

Men maktabda o‘qituvchi bo‘lib ishlayman. Ikki o‘quv yilidan buyon vazir jamg‘armasidan ustama olaman. Ammo har yili bizga ushbu ustama pullari qo‘shib hisoblanib, ta’til puli to‘lanmaydi. Vaholanki, undan daromad solig‘i olinadi. Ushbu masalaning qonuniy yechimi uchun maslahat bering, iltimos.

Javob

Vazirlar Mahkamasining 2022-yil 2-avgustdagi 425-son qaroriga 1-ilova “Maktabgacha va maktab ta’limi vazirining jamg‘armasi to‘g‘risida”gi nizom Maktabgacha va maktab ta’limi vaziri jamg‘armasi mablag‘larini shakllantirish va undan foydalanish, Jamg‘arma mablag‘lari hisobidan Maktabgacha va maktab ta’limi tizimidagi pedagog xodimlarni rag‘batlantirish tartibini belgilaydi.

MK 233-moddasi (Xodimga har yilgi mehnat ta’tilida bo‘lgan vaqti uchun o‘rtacha ish haqi to‘lash) 1-qismiga ko‘ra, har yilgi mehnat ta’tilida bo‘lgan vaqti uchun xodimga ushbu Kodeksning 257-moddasiga muvofiq hisoblab chiqariladigan o‘rtacha ish haqining saqlanishi kafolatlanadi.

MK 257-moddasi (O‘rtacha ish haqi va uni hisoblab chiqarish tartibi) 2-qismiga ko‘ra, o‘rtacha ish haqini hisoblab chiqarish uchun xodimga hisoblangan ish haqining tarkibiga soliq to‘g‘risidagi qonunchilikda nazarda tutilgan, soliq solinishi lozim bo‘lgan, ish beruvchi tomonidan haqiqatda to‘langan mehnatga haq to‘lash tarzidagi barcha daromadlar kiritiladi.

Demak, e’tibor bering, ish beruvchi tomonidan haqiqatda to‘langan mehnatga haq to‘lash tarzidagi barcha daromadlar kiritiladi deyilmoqda.  

MK 19, 26-moddalariga ko‘ra, vazirlik sizning ish beruvchingiz emas, sizning ish beruvchingiz maktab hisoblanadi! Shu o‘rinda, bir narsani ta’kidlab o‘tsak, ko‘pchilik ish beruvchi sifatida maktab direktorini tushunadi, direktor ish beruvchi hisoblanmaydi, direktor MK 485-moddasiga ko‘ra, tashkilot rahbari hisoblanadi. Ish beruvchi va tashkilot rahbari boshqa-boshqa tushunchalardir, chalkashtirib yubormaslik lozim.

Demak, Maktabgacha va maktab ta’limi vaziri jamg‘armasi mablag‘lari hisobidan malakali pedagog kadrlarga to‘lanadigan har oylik ustama har yilgi mehnat ta’tili uchun o‘rtacha ish haqini hisoblab chiqarishda hisobga olinmaydi.