Jazirama issiqdan xodimlarni himoya qilish bo‘yicha kechiktirib bo‘lmaydigan choralar aytildi

Davlat mehnat inspeksiyasi ish beruvchilarni jazirama issiq sharoitida xodimlarning hayoti va sog‘lig‘ini muhofaza qilish maqsadida kechiktirib bo‘lmaydigan majburiy choralarni ko‘rishga chaqirdi. 

Qayd etilishicha, ish beruvchilar ishning eng issiq vaqtlarida, odatda soat 11:00 dan 16:00 gacha bo‘lgan davrda ochiq havodagi ishlarni qisqartirishi yoki vaqtincha to‘xtatishi, shuningdek, aynan shu vaqtda og‘ir jismoniy mehnatni cheklashi yoki to‘xtatishi lozim. 

Shuningdek, xodimlar uchun toza va salqin ichimlik suvi doimiy ravishda hamda yetarli miqdorda mavjud bo‘lishi, tibbiy ko‘rikdan o‘tmagan xodimlar ishga qo‘yilmasligi, qulay salqin yoki soyali dam olish joylari tashkil etilib, ularga muntazam dam olish imkoniyati yaratilishi talab etiladi. 

Bundan tashqari, ish beruvchilar xodimlarni yengil, havo o‘tkazuvchi va issiqdan himoya qiluvchi maxsus kiyimlar bilan ta’minlashi, issiq urishi va suvsizlanish belgilari, ularning oldini olish hamda bunday holatlarda birinchi yordam ko‘rsatish tartibi bo‘yicha barcha xodimlarni o‘qitishi zarur. 

Davlat mehnat inspeksiyasi sog‘lig‘i yomonlashgan xodimga zudlik bilan birinchi yordam ko‘rsatilishi shartligini ham alohida ta’kidladi.