“So‘nggi qo‘ng‘iroq” tadbiri uchun faqat bir soat vaqt ajratiladi

06:00 / 14.05.2024 3.50k

Maktabgacha va maktab ta’limi vazirligi tomonidan “Umumiy o‘rta ta’lim muassasalarida 2023-2024 o‘quv yilini yakunlash va “So‘nggi qo‘ng‘iroq” tadbirlarini o‘tkazish bo‘yicha tavsiyalar” ishlab chiqildi.

Unga ko‘ra “So‘nggi qo‘ng‘iroq”da faqatgina 1-, 4-, 9-, 11-sinf o‘quvchilari ishtirok etib, tadbir 25-may kuni ertalab soat 8:00 dan 9:00 ga qadar tashkil etiladi.

Tadbirda yil davomida namunali xulq va a’lo baholarga o‘qib, eng yuqori reyting ko‘rsatkichlariga erishgan iqtidorli bitiruvchilar taqdirlanadi.

Shuningdek, maktab hayotida faol ishtirok etayotgan, shuningdek, odob-axloqi, intiluvchanligi bilan tengdoshlariga o‘rnak bo‘layotgan o‘quvchilarning ota-onalariga “Eng faol ota”, “Jonkuyar ona”, “Mas’uliyatli ota-ona”, “A’lochi o‘quvchi otasi”, “Bilimli qiz onasi” kabi nominatsiyalari bo‘yicha tashakkurnomalar beriladi.

“So‘nggi qo‘ng‘iroq” tadbirlari munosabati bilan quyidagilar taqiqlanadi:

restoran va kafelar hamda xonadonlarda “Bitiruv oqshomlari” o‘tkazish uchun ota-onalardan pul yig‘ish;

bitiruv tadbirlarida o‘quvchilardan qimmatbaho sovg‘alar uchun pul yig‘ish, bitiruv kechalariga atab qimmatli kiyimlar olish, restoranlarda o‘tkazish;

“So‘nggi qo‘ng‘iroq” tadbirlarini, bosqichli nazorat imtihonlari va yakuniy davlat attestatsiyalarini o‘tkazishda, ta’lim muassasalarini yangi o‘quv yiliga tayyorlash borasida o‘quvchi va bitiruvchilar hamda ularning ota-onalaridan turli xil pul yig‘imlariga yo‘l qo‘ymaslik.

O‘quvchilarning guruh-guruh bo‘lib xiyobonlar, istirohat bog‘lari, cho‘milish havzalariga borib, turli ko‘ngilsiz holatlarni keltirib chiqarishining oldini olish hamda bitiruvchilarning yengil avtomobillarda guruh-guruh bo‘lib harakatlanishlarini cheklash bo‘yicha ota-onalar o‘rtasida tushuntirish ishlarini olib borish tavsiya etiladi.