O'quvchilari Prezident maktabiga kirgan pedagoglarga qanday imtiyozlar bor?

Vazirlar Mahkamasining 2019-yil 30-sentyabrdagi 823-sonli qarori bilan tasdiqlangan nizomning 32-bandiga ko‘ra Prezident maktablariga tanlov asosida qabul qilingan har bir o‘quvchi uchun tegishli umumta’lim muassasasining mos (tanlov, musobaqa, imtihon fanlari) fan o‘qituvchisi Jamg‘arma mablag‘lari hisobidan bazaviy tarif stavkasining ikki baravari miqdorida bir yo‘la mukofot puli to‘lash yo‘li bilan rag‘batlantirilishi mumkin.

Shuningdek, Vazirlar Mahkamasining 2022-yil 2-avgustdagi 425-sonli qarori bilan tasdiqlangan nizomga ko‘ra umumiy o‘rta ta’lim muassasalari o‘quvchilari Prezident, ijod va ixtisoslashtirilgan maktablarga kirish imtihonlarida eng yuqori natijalarni ko‘rsatgan taqdirda “Boshlang‘ich ta’lim” yoki tegishli fan o‘qituvchilari vazir Jamg‘armasi hisobidan tayinlanadigan har oylik ustama olish uchun tavsiya qilinishi mumkin.

Faqat mazkur ustamaga da’vogar pedagog xodimlar Maktabgacha va maktab ta’limi vazirligida doimiy ravishda ishlaydigan Ishchi guruh tomonidan o‘tkaziladigan saralash bosqichlaridan ham o‘tib, eng yuqori ballni qo‘lga kiritishi kerak bo‘ladi.

E’tibor bering, pedagog xodimning o‘quvchilari faqat Prezident maktabiga o‘qishga qabul qilingan taqdirdagina direktor jamg‘armasidan bazaviy tarif stavkasining ikki baravari miqdorida mukofot puli to‘lanadi.

Ya’ni, Ixtisoslashgan ta’lim muassasalari agentligi tasarrufidagi yangi tashkil qilingan ixtisoslashtirilgan maktablarga o‘quvchilari qabul qilinganligi uchun mukofot berilmaydi.