Vazir Hilola Umarova o‘z ish faoliyatini davom ettiradimi?

Xabaringiz bor, 2023-yildan buyon Maktabgacha va maktab ta’limi vaziri lavozimida faoliyat yuritib kelayotgan Hilola Umarova joriy yil bo‘lib o‘tgan parlament saylovlarida o‘z nomzodini ilgari surgandi.

Aniqrog‘i, vazir partiya ro‘yxati bo‘yicha nomzod sifatida ko‘rsatilgandi. Amaldagi tartibga ko‘ra, agar Hilola Umarova deputatlikka saylanadigan bo‘lsa, egallab turgan lavozimidan voz kechishi kerak edi. 

Saylov kodeksiga ko‘ra, partiya ro‘yxati bo‘yicha saylanib, mandatga ega bo‘lgan deputat mandatdan ixtiyoriy ravishda voz kechgan taqdirda, Markaziy saylov komissiyasi tegishli partiya ro‘yxatidagi tartib raqam bo‘yicha keyingi nomzodga bir kunlik muddatda xabarnoma yuboradi.

Ya’ni, shartli vazir mandatini qaytarib bersa, ro‘yxat bo‘yicha mandat olmagan nomzodga mandat beriladi.

2024-yil 28-oktyabr kuni saylov natijalari ham e’lon qilindi. Unda O‘zLiDeP 64 ta o‘rin bilan g‘alaba qozondi. Vazir Hilola Umarova esa aynan O‘zLiDePdan nomzod sifatida ko‘rsatilgandi.

Shu sababli, xalqtaliminfo.uz vazirlik bilan bog‘lanib, Hilola Umarovaning kelgusidagi faoliyati bilan qiziqdi.

Maktabgacha va maktab ta’limi vazirligi rasmiylarining xalqtaliminfo.uz'ga ma’lum qilishicha, Umarova Hilola Uktamovna deputatlik mandatdan ixtiyoriy ravishda voz kechish to‘g‘risida bugun Markaziy saylov kommissiyasiga ariza yozgan. Ya’ni, u vazir sifatida o‘z ish faoliyatini davom ettiradigan bo‘ldi.