O‘qituvchilardan yashash xonadonini suratga olish so‘ralyapti

Ijtimoiy tarmoqlarda Sirdaryo viloyatida o‘tkazilayotgan “Eng namunali xonadon” tanlovi yuzasidan turli xabarlar tarqalmoqda. Xususan, o‘qituvchilardan tanlovda ishtirok etish uchun o‘z uylarining turli qismlarini suratga olib yuborish talab qilinayotgani aytilmoqda.

Jurnalist Ibrat Safo ushbu holatni tanqid qilib, tanlov uchun ishtirokchilar topishda qiyinchilik yuzaga kelgani sababli navbatdagi vazifa yana maktablar zimmasiga yuklangani haqida yozgan.

Muallifning ta’kidlashicha, mahalla aholisi orasida tanlovga qiziqish past bo‘lgani bois, tanlovni tashkil etayotganlar o‘qituvchilarni jalb etishga qaror qilgan. Buning uchun esa maktablarga tegishli ko‘rsatmalar yuborilgani va pedagoglardan o‘z xonadonlarining turli burchaklarini suratga olib jo‘natish so‘ralayotgani aytilmoqda.

Uning fikricha, bu kabi topshiriqlar o‘qituvchilarning shaxsiy hayotiga daxldor bo‘lib, pedagoglarni o‘z xonadonlarini begona shaxslarga namoyish etishga majbur qilish to‘g‘ri emas.

Ijtimoiy tarmoqlarda tarqalgan xabarlarga ko‘ra, ayrim maktablarda tanlov ishtirokchilari bo‘yicha ro‘yxatlar ham shakllantirilayotgan bo‘lishi mumkinligi taxmin qilinmoqda. Biroq bu borada hozircha Sirdaryo viloyati Maktabgacha va maktab ta’limi boshqarmasi yoki tanlov tashkilotchilari tomonidan rasmiy izoh berilmagan.

Pedagoglardan bunday tanlovlarda majburiy tartibda qatnashish, shaxsiy uy-joyini suratga olib yuborish talab qilinayotgani o‘qituvchilarning shaxsiy hayot daxlsizligiga ham zid hisoblanadi.