Attestatsiyada qatnasholmagan o‘qituvchilar nima qiladi?

Savol

Men attestatsiya kuni O‘zbekistonda emasdim, oxirida topshirishga ruxsat beriladimi? Nima qilish kerak, ruxsat olish uchun? Rahbarlarimizga aytsam, oxirida so‘rasa beramiz deydi, unda kech bo‘lmaydimi?

Javob

Pedagog xodimlarni attestatsiyadan o‘tkazish Vazirlar Mahkamasining 2021-yil 17-sentyabrdagi 572-son qarori bilan tasdiqlangan “Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida”gi nizom bilan tartibga solinadi.

Mazkur nizomning 45-bandiga ko‘ra, pedagog kadrlar attestatsiyaga uzrli sababga ko‘ra kelmagan bo‘lsa, ularning attestatsiyasi boshqa muddatga ko‘chiriladi.

Quyidagi holatlar uzrli sabablar deb baholanadi:

• xodimning vaqtincha mehnatga qobiliyatsizligi;

• davlat yoki jamoat vazifalarini bajarganligi;

• respublika va xalqaro musobaqalarda ishtirok etganligi;

• vaqtincha xorijiy mamlakatda safarda bo‘lganligi;

• yaqin qarindoshining vafoti;

• vakolatli davlat organi yoki ta’lim tashkilotlari rahbarlarining ma’lumotnomasida ko‘rsatilgan boshqa asoslar.

Demak, pedagog xodimning vaqtincha xorijiy mamlakatda safarda bo‘lganligi sababli test sinovlarida ishtirok etolmaydigan bo‘lsa, attestatsiya test sinovi boshqa muddatga ko‘chiriladi.

Bunda uzrli sabablarga ko‘ra malaka (test) sinovlarida ishtirok eta olmagan pedagoglar uchun test sinovlari bo‘lib o‘tadigan kunlar Maktabgacha va maktab ta’limi vazirligi tomonidan e’lon qilinadi.

Eslatib o‘tamiz, “Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida”gi nizomning 22-bandiga ko‘ra, pedagog kadrlar uzrli sabablarga ko‘ra navbatdan tashqari attestatsiyaga kelmaganligi tufayli ularning attestatsiyasi boshqa muddatga ko‘chirilgan taqdirda, yig‘im takroran undirilmaydi.