O‘qituvchilar o‘rnini sun’iy intellekt egallamoqda — AQSh

AQShdagi Alpha School maktabining barcha o‘qituvchilari sun’iy intellekt bilan almashtirildi. Bu haqda cbsnews.com nashri xabar berdi.

Bunda har bir o‘quvchi matematika, tabiiy fan va o‘qish fanlarini ertalab ikki soat davomida o‘zining qobiliyatiga mos bo‘lgan tezlikda o‘rganadi. Dars jarayoni esa maxsus AI (sun’iy intellekt) dasturi tomonidan boshqariladi: kimdir tezroq, kimdir sekinroq o‘zlashtiradi — tizim esa barchasini individual tarzda shunga moslashtiradi.

Maktabdagi o‘qituvchilar “teacher” emas, balki “guide” (yo‘lko‘rsatuvchi) deb ataladi. Ularning vazifasi endi dars o‘tish emas, balki bolalarga yo‘l ko‘rsatish, rag‘batlantirish va motivatsiya berishdir.

Yo‘lko‘rsatuvchi Lyuk Fillipsning aytishicha, sun’iy intellekt o‘qituvchi o‘rinini bosa olmaydi, balki u inson va texnologiya birgalikda ishlashini ta’minlaydi. Bu esa uning yutug‘idir.

Maktab asoschisi Makkenzi Prays bu darslarni “hayot uchun zarur ko‘nikmalar” deb aytmoqda. Uning fikricha, har bir bola o‘ziga mos tezlikda o‘rganish imkoniga ega bo‘lsa, ta’lim natijasi ancha samarali bo‘ladi.

O‘quvchilarning odatiy kun davomidagi vaqti esa butunlay boshqacha. O‘quvchilar bu paytda loyiha ishlari bilan shug‘ullanishadi, moliyaviy savodxonlikni, jamoa oldida so‘zlashni o‘rganadilar.

Ba’zi tanqidchilar maktabda inson o‘rnini texnologiya egallayotganidan xavotirda. Biroq Prays bunga quyidagicha javob beradi:

“Yo‘lko‘rsatuvchilar akademik fanlarni o‘qitmaydi, lekin ular bolalar bilan insoniy aloqa o‘rnatadi. Har hafta har bir o‘quvchi o‘z yo‘lko‘rsatuvchisi bilan 30 daqiqa davomida yakka tartibda suhbatlashadi. Kunduzi esa ular guruh bo‘lib ishlash, muloqot qilish orqali o‘rganishadi.”

Maktab rahbariyatining fikricha, bu — ta’limning kelajagi. Chunki u yerda har bir bola sun’iy intellekt yordamida o‘z salohiyatini to‘liq namoyon etish imkoniga ega bo‘ladi.