Boshlang‘ich sinf o‘qituvchilariga 70% ustama to‘liq to‘lanmaydimi?

Savol

Men boshlang‘ich sinf o‘qituvchisiman. Kuzgi attestatsiyada 94 ball bilan oliy toifa hamda 70 foizlik ustamani oldim. 

Biroq, menga qishki tarifikatsiya qilinganda 70 foizlik ustama faqat o‘qish savodxonligi, matematika va ona tili dars soatlariga to‘lanib, 2 soat informatika hamda 1 soat musiqa faniga amal qilinmaydi deb, oyligimni kam hisobladi.

Javob

O‘zbekiston Respublikasi Prezidentining 2023-yil 26-maydagi PF-79-son Farmoni bilan xalqaro standartlar asosida malaka sertifikatiga ega bo‘lgan pedagoglarga 70 foizlik ustama berish tizimi yo‘lga qo‘yilgan.

Mazkur Farmonning 3-v-bandida pedagog kadrlarga xalqaro standartlar asosida malaka sertifikatini berish amaliyotini yo‘lga qo‘yish, bunda xalqaro standartlar asosida malaka sertifikatini olgan pedagog kadrlarga tarif stavkalarining amaldagi miqdorlariga nisbatan 70 foiz miqdorida qo‘shimcha haq to‘lanishi nazarda tutilgan.

Shuningdek, ushbu qoida Vazirlar Mahkamasining 2025-yil 28-fevraldagi 130-sonli qarorida ham o‘z aksini topgan.

Vazirlar Mahkamasining 2005-yil 21-dekabrdagi 275-son qarori bilan tasdiqlangan “Xalq ta’limi xodimlari mehnatiga haq to‘lash to‘g‘risida”gi nizomning 21-bandiga ko‘ra Pedagog xodimlarga qonunchilik hujjatlarida belgilangan ustamalar, shu jumladan mavjud sertifikatlari uchun to‘lanadigan ustamalar, tarifikatsiya ro‘yxatida ajratilgan dars soatlariga (o‘qituvchining tarif stavkasiga) mutanosib ravishda to‘lab beriladi.

“Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida”gi (ro‘yxat raqami 3271) nizomga ko‘ra:

• bazaviy tarif stavkasi ― bir stavka dars soati uchun o‘qituvchining ma’lumoti va malaka toifasiga ko‘ra belgilangan bazaviy haq miqdori;

• o‘qituvchining tarif stavkasi ― o‘qituvchiga biriktirilgan dars soatlari asosida bir stavka uchun belgilangan bazaviy tarif stavkadan kelib chiqib aniqlanadigan miqdor.

Bunda xalqaro standartlar asosida malaka toifasi sertifikatiga ega bo‘lgan pedagoglarga 70 foizlik ustama ularning tarif stavkalarining amaldagi miqdorlariga nisbatan qo‘shimcha ravishda to‘lab berilishi kerak bo‘ladi.

Ya’ni, 70 foizlik ustamani qo‘lga kiritgan boshlang‘ich sinf o‘qituvchisiga mazkur ustamalar uning tarif stavkasining amaldagi miqdoridan kelib chiqqan holda u o‘tayotgan barcha dars soatlari uchun to‘liq to‘lab berilishi lozim.