Nosozlikmi yoki ogohlantirish? Vazirlik test sinovi vaqtidagi holatga tushuntirish berdi

Bugun Informatika va axborot texnologiyalari fanidan bo‘lib o‘tayotgan attestatsiya test sinovlari vaqtida ayrim hududlarda platforma yana ishlamay qolgani haqida xabar bergandik.

Shundan so‘ng, biz ham Maktabgacha va maktab ta’limi vazirligining cams.uzedu.uz platformasidan jarayonni to‘g‘ridan-to‘g‘ri kuzatib, holatni tekshirib ko‘rdik.

Biz esa ikki nafar (ayol) pedagoglar test topshiriqlarini bajarayotgan vaqtida platformada nosozlik yuzaga kelib, test birdan yakunlanib qolganligiga guvoh bo‘ldik. Taxminan, 10 daqiqalardan keyin esa platforma yana ishlab ketgan.

Holat yuzasidan Maktabgacha va maktab ta’limi vazirligi mas’ullari xalqtaliminfo.uz'ga tushuntirish berdi.

Vazirlik mas’ullarining aytishicha, videoda e’lon qilingan holatda nosozlik bo‘lmagan, balki pedagoglar tomonidan noto‘g‘ri amallar bajarilgan bo‘lishi ham mumkin.

Shuni ham alohida ta’lidlash lozimki, bugungi nosozlik darajasi joriy yil 15-aprelda bo‘lib o‘tgan holatdan tubdan farq qiladi. Ya’ni, bu safar pedagog xodimlar testga kirguniga qadar kichik nosozliklar kuzatildi, lekin test jarayoni boshlangach, tizimda deyarli nosozlik kuzatilmadi.

Xo‘sh, test jarayoni vaqtida pedagoglar qanday harakat qilsa, platforma ogohlantirish beradi?

Test jarayonida faqat numberpad (raqamli klaviatura) ishlatilishi mumkin, boshqa tugmalar (masalan, Alt, Tab yoki Windows tugmalari) bosilganda, dastlab ogohlantirish paydo bo‘ladi. Agar bu holat yana takrorlansa, ekranda qizil rangda ogohlantiruvchi oyna paydo bo‘ladi.

Shunda kuzatuvchi so‘nggi marta ogohlantirib, maxfiy kodni kiritish orqali testni davom ettirishga ruxsat beradi. Ushbu harakat yana qaytarilsa, tizim avtomatik tarzda pedagogni testdan chetlashtiradi. Umuman olganda, platforma qoidabuzarliklarni ikki marta kechiradi, ammo uchinchi marta bunday urinish qilinsa, pedagog testdan chiqarib yuboriladi.

Shuningdek, test sinovi paytida o‘qituvchi boshqa tomonga qarab, kim bilandir gaplashgan bo‘lsa, yoki ko‘p harakatlansa ham platforma ogohlantirish berishi mumkin. Bu haqda vazirlik tomonidan tashkil etilgan matbuot anjumanida ham batafsil javob berilgandi.

Eslatib o‘tamiz, texnik nosozlik joriy yilning 15-aprel kuni ham aynan Informatika va axborot texnologiyalari fani o‘qituvchilarida kuzatilgandi. Shundan so‘ng vazirlik attestatsiyadan norozi bo‘lgan pedagog kadrlarga yana qayta testda ishtirok etishga ruxsat berishga majbur bo‘lgandi.